Стала вядома, каму належыць скандальны рэстаран «Лебядзіны»
20- 15.01.2020, 14:23
- 76,371
Журналісты правялі расследаванне.
Рэстаран «Лебядзіны» на беразе аднайменнага заказніка зарэгістраваны на прадпрыемства, заснавальнікам якога з'яўляецца Нацыянальны алімпійскі камітэт. Што пра гэта кажуць НАК і забудоўнік аб'екта «Тапас» - у матэрыяле tut.by.
Рэстаран «Лебядзіны» ў канцы снежня пабудаваў буйны забудоўнік «Тапас». Аб'ект уваходзіць у шматфункцыянальны комплекс «Алімпік парк».
З інфармацыі гандлёвага рэестра вынікае, што рэстаран «Лебядзіны» зарэгістраваны на ўнітарнае прадпрыемства «Лебядзіны парк».
Згодна з выпіскай з дзяржрэгістра юрыдычных асоб, адзіным заснавальнікам УП «Лебядзіны парк» з'яўляецца Нацыянальны алімпійскі камітэт Рэспублікі Беларусь. Прадпрыемства зарэгістраванае 16 снежня 2019 года.
Кіраўніком «Лебядзінага парку» з'яўляецца Валерый Філіповіч - цяперашні дырэктар Палаца спорту.
Таксама Філіповіч значыцца гульцом у аматарскай камандзе «Шчыт». Згодна з інфармацыяй на сайце спартовага клуба Лукашэнкі, у спіс гульцоў гэтай каманды ўваходзіць у тым ліку сын Аляксандра Лукашэнкі - Зміцер.
Нагадаем, Аляксандр Лукашэнка прыязджаў на адкрыццё рэстарацыі 21 снежня.
НАК і забудоўнік: «рэстарацыя ва ўласнасці не значыцца» і «кіроўная кампанія вызначаецца»
Нягледзячы на пералічаныя вышэй звесткі, у НАК нам адказалі, што рэстаран «Лебядзіны» ў іх уласнасці не значыцца і ў эксплуатацыі такі аб'ект не знаходзіцца.
А што кажа забудоўнік шматфункцыянальнага комплексу «Алімпік парк», у які ўваходзіць у тым ліку рэстарацыя? Са слоў прадстаўніка кампаніі, цяпер заканчваецца падрыхтоўка дакументаў, якія ўстанаўліваюць права што да формы ўласнасці аб'екта.
- Група кампаній «Тапас» з'яўляецца забудоўнікам і фактычна не мае досведу кіравання аб'ектамі грамадскага харчавання, кіроўная кампанія рэстарацыяй вызначаецца. Прававы статус аб'екта найбліжэйшым часам будзе названы ў СМІ, - адказалі нам у прэс-службе.
У рэстаране «Лебядзіны» паабяцалі адказаць на нашы пытанні пазней.
Насуперак пратэстам і са скандаламі
Нагадаем, будаўніцтва і піяр рэстарана «Лебядзіны», які ўваходзіць у комплекс «Алімпік парк» на праспекце Пераможцаў, суправаджаліся скандаламі. Пасля таго як суд аштрафаваў забудоўніка за будаўніча-мантажныя працы без неабходных дазволаў, указам Лукашэнкі ад 5 снежня 2018 года №468 у генплан Менска тэрмінова ўнеслі змены і выключылі тэрыторыю забудовы з зоны прыродных асабліва ахоўных тэрыторый.
Такім чынам кампанія «Тапас» узвяла побач з заказнікам комплекс «Алімпік парк», які ўключае ў сябе шматкватэрныя жылыя дамы, катэджы, спартовы цэнтр з дзвюма лядовымі арэнамі і рэстарацыяй, пабудаванай на беразе вадаёма насуперак пратэстам эколагаў і грамадскіх актывістаў.
А перад афіцыйным адкрыццём рэстарацыі адбыўся яшчэ адзін скандал: найманая піяршчыца апублікавала ў Instagram паведамленне для хейтэраў, пасля якога на яе абрынулася хваля крытыкі і абурэння карыстачоў.