Зяленскі запатрабаваў за два тыдні знайсці тых, хто праслухоўваў Ганчарука

Адпаведныя загады прэзідэнт Украіны даў сілавікам.

Прэзідэнт Украіны Уладзімір Зяленскі патрабуе ад праваахоўных органаў за два тыдні ўстанавіць датычных да запісу гутарак падчас сустрэчы прэм'ер-міністра Аляксея Ганчарука, міністраў і прадстаўнікоў Нацыянальнага банка, паведамляе «Украінская праўда» са спасылкай на Офіс прэзідэнта Украіны.

«Патрабую, каб за два тыдні, як мага хутчэй каб мы з вамі атрымалі інфармацыю - хто вёў запісы... Знайсці, хто гэта зрабіў, і з гэтым разабрацца», - заявіў Зяленскі.

Адпаведнае заданне кіраўнік дзяржавы паставіў падчас сустрэчы з кіраўнікамі Службы бяспекі Украіны, Офіса генеральнага пракурора, Міністэрства ўнутраных спраў, Нацыянальнага антыкарупцыйнага бюро, Дзяржаўнага бюро расследаванняў і Управы дзяржаўнай аховы.

Акрамя таго, прэзідэнт адзначыў, што ў рамках крымінальнай справы павінна быць дакладна ўстаноўленае кола асоб, якія прысутнічалі на перамовах, і высветленыя абставіны, пры якіх яны адбываліся.

Ён дадаў, што, паводле слоў прэм'ер-міністра, было некалькі перамоваў, і сустрэча, з якой быў апублікаваны першы ўрывак, прадаўжалася 5 гадзін.

Зяленскі таксама патрабуе цягам двух тыдняў распрацаваць неабходныя захады, каб выключыць такія інцыдэнты ў будучыні і тэхнічна забяспечыць абарону інфармацыі.

З ягоных слоў, несанкцыянаванае праслухоўванне і фіксаванне размоў не павінна мець месца ў памяшканнях органаў дзяржаўнай улады ўсіх узроўняў, бо гэта пытанне нацыянальнай бяспекі.