Колькасць насельніцтва Нямеччыны дасягнула рэкорднага ўзроўню

Што стаіць за гэтай дынамікай?

Колькасць насельніцтва Нямеччыны прадаўжае павялічвацца, але тэмпы ягонага прыросту ўпалі да самага нізкага ўзроўню з 2012 года. Паводле звестак на канец 2019 года, у ФРГ пражывала рэкордная колькасць людзей – 83,2 млн чалавек – на 200 тысячаў больш, чым у канцы 2018-га. У той самы час тэмпы прыросту насельніцтва апынуліся значна ніжэйшыя, чым з 2013 да 2018 года, паведаміла Федэральная статыстычная ўстанова ў пятніцу, піша dw.com.

Статыстыкі патлумачылі новы прырост насельніцтва Нямеччыны выключна прытокам мігрантаў. "Без міграцыйнага прафіцыту насельніцтва ФРГ скарачалася б ужо з 1972 года, паколькі з таго часу ў краіне штогод памірала больш людзей, чым нараджалася", – адзначылі эксперты.

Дэфіцыт нараджальнасці ў ФРГ

Паводле ацэнак статыстыкаў, у 2019 годзе ў ФРГ нарадзіліся ад 770 да 790 тысячаў чалавек, пры гэтым памерлі ад 920 да 940 тысячаў. У выніку дэфіцыт нараджальнасці летась склаў ад 130 да 170 тысячаў чалавек. У 2018-м гэты паказнік склаў 167 400 чалавек.

Міграцыйны прафіцыт у 2019 годзе склаў ад 300 да 350 тысячаў чалавек. Гэты паказнік скарачаецца чацвёрты год запар пасля рэкорду 2015 года, калі на тэрыторыю ФРГ хлынулі плыні бежанцаў. З 2018 года ў Нямеччыну перасялілася на 399700 чалавек больш, чым з'ехала.

Старыцца насельніцтва Нямеччыны

Нямеччына пакутуе ад хранічнага дэфіцыту нараджальнасці, яе насельніцтва – адно з самых старых у свеце. У 2019 годзе ў ФРГ была зарэгістраваная найбольшая з 1972 года колькасць смерцяў.

Старэнне насельніцтва становіцца ўсё больш сур'ёзнай праблемай для пенсійнай сістэмы краіны. Паводле нядаўняга апытання, галоўную заклапочанасць большасці немцаў выклікае міграцыйная палітыка канцлеркі ФРГ Ангелы Меркель (Angela Merkel).