«Расейцы адразу пагадзіліся пералічыць сотні мільёнаў даляраў, каб мы не арыштавалі іх актывы»

Гісторыя ўкраінскай перамогі над "Газпромам".

Расейскі "Газпром" неадкладна пагадзіўся выплаціць Украіне некалькі соцень мільёнаў даляраў, калі НАК "Нафтагаз" пачаў працэс абцяжарання акцый і іншых актываў расейскай кампаніі ў краінах Еўропы, напрыклад, у Вялікай Брытаніі.

Пра гэта выканаўчы дырэктар НАК Юрый Вітрэнка паведаміў у інтэрв'ю выданню gordonua.com.

"У Вялікай Брытаніі, каб мы не арыштавалі іх актывы, расейцы адразу самі пагадзіліся пералічыць на рахунак ангельскага суда сотні мільёнаў даляраў, якія аўтаматычна трапілі да нас пасля таго, як скончыўся разгляд апеляцыі на пастанову Стакгольмскага арбітражу што да транзітнай справы", - сказаў ён.

Са слоў Вітрэнкі, у Вялікай Брытаніі знаходзяцца "звышважныя" для "Газпрома" актывы.

"Напрыклад, актывы "Паўднёвага струменю" і "Паўночнага струменю", а гэта рэальныя газаправоды, па якіх ідзе газ і па якіх кожны квартал выплачваюцца дывідэнды. Гэта вялікія сумы, амаль $150 млн кожны квартал. То бок, гэта рэальныя актывы, а не проста паперкі. Для таго, каб мець магчымасць размеркаваць дывідэнды, яны пагадзіліся пералічыць сотні мільёнаў даляраў на рахунак у банку, якія да нас аўтаматычна трапляюць", - дадаў ён.

28 лютага 2018 года Стакгольмскі арбітраж задаволіў пазоў "Нафтагазу" да "Газпрому" пра недастатковыя аб'ёмы транзіту. Украінская кампанія дамаглася кампенсацыі ў суме $4,63 млрд. З улікам таго, што арбітраж пацвердзіў запазычанасць украінскага боку за пастаўкі газу ў суме, большай за $2 млрд, "Газпром" павінен быў выплаціць "Нафтагазу" $2,56 млрд. На сцвярджэнні ўкраінскай кампаніі, з 1 сакавіка 2018 года на суму запазычанасці налічвалася пеня. "Газпром" абскардзіў абедзве пастановы Стакгольмскага арбітражу і пачаў працэдуру скасавання кантракту з "Нафтагазам".

27 лістапада 2019 года суд адхіліў апеляцыю "Газпрома" на адзін з прысудаў Стакгольмскага арбітражу і пастанавіў кампенсаваць "Нафтагазу" выдаткі на судовы працэс.

У ліпені 2018 года "Нафтагаз" пачаў новы працэс супраць "Газпрома" ў Стакгольмскім арбітражы з патрабаваннем перагледзець транзітны тарыф на 2018-2019 гады. Папярэдняя сума патрабаванняў складала амаль $12 млрд (без адсоткаў).

21 снежня 2019 года ў "Газпроме" паведамілі, што выплацяць "Нафтагазу" да Новага года больш за $2,9 млрд пры ўмове адмовы ўкраінскага боку ад новых прэтэнзій і адклікання арбітражных і судовых пазоваў, паводле якіх няма канчатковых пастаноў.

27 снежня НАК заявіў, што пасля разгляду ў Стакгольмскім арбітражы "Газпром" выплаціў Украіне агулам $5 млрд.