Марскія парты Польшчы выйшлі на рэкордныя паказчыкі

Самы вялікі рост аб'ёмаў транспартавання марскіх грузаў быў зафіксаваны ў Гданьску.

Марскія парты Польшчы за 2019 год выйшлі на рэкордныя паказчыкі. Гадавы аб'ём транспартавання грузаў дзейных балтыйскіх партоў краіны склаў больш за 108 мільёнаў тон, што на два з лішнім адсоткі больш, чым у 2018 годзе, паведамляе «Польскае радыё».

Міністэрства марскога гаспадаркі і ўнутранага суднаходства адзначае, што паказчык сто мільёнаў тон перавозкі перавышаны другім разам за апошнія гады. На думку міністэрства, на дасягненне гэткага добрага выніку паўплывала, сярод іншага, спрыяльная сусветная кан'юнктура. «Мы дасягнулі росту аб'ёмаў транспартавання марскіх грузаў дзякуючы высокаму росту айчыннай эканомікі, а таксама міжнароднай кан'юнктуры. Для падтрымання гэтай тэндэнцыі нам неабходна нарошчваць перавалачныя магутнасці айчынных марскіх тэрміналаў», - адзначыў віцэ-міністр Гжэгаж Віткоўскі.

Самы вялікі, гэта значыць, больш за 6-адсоткавы рост аб'ёмаў транспартавання марскіх грузаў быў зафіксаваны ў порце Гданьску. Больш чым на два адсоткі палепшыў порт Гдыні. У той жа час амаль 3-адсоткавае зніжэнне было адзначанае ў Шчэцін-Свінавусці. Міністэрства падкрэслівае, што ў сувязі з ростам перавалкі ў польскіх партах выраслі падатковыя паступленні ў дзяржбюджэт. У 2018 годзе яны склалі больш за сорак мільярдаў злотых.