Пуцін назваў тры задачы Дзяржрады

Што стала вядома з занесенага ў Думу законапраекта.

«Рэформа» расейскай Канстытуцыі, самая маштабная за ўсю найноўшую гісторыю краіны, разгортваецца з хуткасцю спецаперацыі, піша finanz.ru.

Не прайшлі і тры працоўныя дні, як скліканая прэзідэнтам працоўная група падала прапановы ў змене Асноўнага закона з подпісамі кіраўнікоў канстытуцыйных камітэтаў Думы і Рады федэрацыі Паўла Крашаніннікава і Андрэя Клішаса, а таксама дырэктара Інстытута заканадаўства і параўнальнага правазнаўства пры ўрадзе Таліі Хабрыевай.

Праз некалькі гадзінаў прэзідэнт унёс у Думу законапраект «Аб удасканаленні рэгулявання асобных пытанняў арганізацыі публічнай улады», у якім упершыню сфармуляваныя задачы Дзяржаўнай рады – органа, які існуе з 2000 года і мае дарадчы статус, а пасля рэформы атрымае канстытуцыйныя паўнамоцтвы.

Згодна з законапраектам, размешчаным на партале прававой інфармацыі, Дзяржрада, як і цяпер, будзе «фармавацца прэзідэнтам».

Першай яе мэтай названае «забеспячэнне ўзгодненага функцыянавання і ўзаемадзеяння органаў дзяржаўнай улады». Згодна з дзейнай Канстытуцыяй, гэта паўнамоцтвы прэзідэнта (артыкул 80, пункт 2).

Другая мэта Дзяржрады – «вызначэнне асноўных напрамкаў унутранай і знешняй палітыкі Расейскай Федэрацыі». Цяпер гэтыя функцыі таксама замацаваныя за прэзідэнтам (артыкул 80, пункт 3). Прэзідэнт зацвярджае, сярод іншага, Канцэпцыю знешняй палітыкі, Ваенную дактрыну, Стратэгію нацыянальнай бяспекі, дактрыну харчовай бяспекі, энэргастратэгію, Стратэгію развіцця мінеральна-сыравіннай базы і г.д.

Акрамя рэгулярных асноватворных дакументаў, прэзідэнт падпісвае разавыя стратэгіі пад канкрэтныя задачы – напрыклад, у кастрычніку Пуцін зацвердзіў Нацыянальную стратэгію развіцця штучнага інтэлекту на перыяд да 2030 года.

Трэцяй мэтай Дзяржрады стане вызначэнне «прыярытэтных кірункаў сацыяльна-эканамічнага развіцця дзяржавы». Такі дакумент існаваў у Расеі да 2014 года – ён прымаўся ў выглядзе пастановы ўрада на аснове прэзідэнцкага паслання Федэральнаму сходу.

Аднак закон, які рэгуляваў гэты дакумент (115-ФЗ «Аб дзяржаўным прагназаванні і праграмах сацыяльна-эканамічнага развіцця Расейскай Федэрацыі»), летам 2014 года быў прызнаны як той, што страціў сілу.

Апошні раз пастанова ўрада «Аб прыярытэтах сацыяльна-эканамічнага развіцця Расейскай Федэрацыі на сярэднетэрміновую перспектыву» была прынятая ў лютым 2014 года. У ёй гаварылася пра неабходнасць «значна палепшыць умовы вядзення прадпрымальніцкай дзейнасці», «знізіць падатковую нагрузку на бізнэс» і распрацаваць «комплекс захадаў для падтрымкі несыравіннага сектара эканомікі».

Пералік паўнамоцтваў Дзяржрады і яе месца ў іерархіі расейскай улады могуць істотна пашырацца. Паводле паправак, статус Дзяржрады вызначыць федэральны закон, які будзе прыняты асобна і на ўсенароднае галасаванне выносіцца не будзе. Цяпер статус Дзяржрады рэгулюецца прэзідэнцкім указам, прынятым у 2000 годзе.

Другое і асноўнае чытанне праекта паправак у Дзярждуме адбудзецца ў лютым, Рада федэрацыі можа зацвердзіць яго ў сакавіку. Галасаванне пазначанае на красавік, найбольш верагодная дата – Дзень касманаўтыкі (12 красавіка, нядзеля), апавяла РБК блізкая да Крамля крыніца.

Іншы, менш верагодны варыянт – 26 красавіка. Напярэдадні галасавання будзе разгорнутая маштабная інфармацыйная кампанія на тэлевізіі ды ў інтэрнэце, кажуць крыніцы РБК: яўка павінна быць вышэйшая за 50%, а ў ідэале на ўчасткі павінна прыйсці не менш людзей, чым на выбары прэзідэнта (67,4%).

Зрэшты, «нават калі прыйдуць 20%, легітымнасць ад гэтага не пацерпіць», падкрэслівае прадстаўнік Крамля. «Хто хацеў, той прыйшоў»; папраўкі прыме парламент, і паводле законе гэтага будзе дастаткова, дадае ён.