Cамыя смешныя адгаворкі ўладаў за хібы ў эканоміцы

Сітуацыя пачынае нагадваць анекдот.

Беларускі ўрад планаваў, што ў мінулым 2019 годзе валавы ўнутраны прадукт вырасце на 4%. Нагадаем, што ВУП паказвае агульны кошт вырабленых у краіне ўсімі сэктарамі эканомікі тавараў і паслуг для канчатковага спажывання і з'яўляецца найважнейшым паказчыкам для характарыстыкі краіны, піша udf.by.

Напраўду ж рост ВУП Беларусі ў мінулым годзе быў амаль у чатыры разы меншы за запланаваны. Як паведаміў днямі Белстат, ён склаў 1,2%.

Незалежныя экспэрты даўно кажуць, што беларуская эканоміка не будзе развівацца без структурных рэформаў і больш кампетэнтных кіраўніцкіх пастаноў уладаў.

Вы думаеце, чыноўнікі ўзялі віну за павольны рост ВУП у мінулым годзе на сябе? Вядома ж, не.

Цёплы канец года

У свежым аглядзе экспэртаў Еўразійскага банка развіцця (ЕАБР) адзначаецца: стрымліваць рост беларускага ВУП мог кліматычны фактар.

Са звестак Белгідрамета, сярэдняя месячная тэмпература лістапада 2019 года ў Беларусі склала 4,2 градуса - што на 3,3 градуса вышэй за кліматычную норму. Гэта прывяло да скарачэння выпрацоўкі электраэнэргіі прадпрыемствамі.

Важна разумець, адкуль могуць расці ногі такіх сцвярджэнняў. Беларусь з'яўляецца ўдзельнікам ЕАБР, гэта значыць дырэктыўна ўплывае на працу і справаздачы банка.

Засушлівае вясна

Што цікава, паўгода таму беларускія ўлады ўжо наракалі на надвор'е, тлумачачы нізкія тэмпы росту ВУП.

Летам міністр эканомікі Дзмітрый Круты заявіў журналістам, што засушлівае надвор'е ў траўні-чэрвені паўплывала на ўраджай і нарыхтоўку кармоў і ў выніку на сітуацыю ў жывёлагадоўлі.

І як быццам падаслалі салому на будучыню: дадаў, што і далей сітуацыя ў сельскай гаспадарцы будзе ўплываць на паказчык ВУП. Але жніво прайшло без катаклізмаў.

Падатковы манеўр у Расеі

Яшчэ ў сакавіку Аляксандр Лукашэнка заклікаў:

«Занадта ўжо мы перабольшваем ціск усялякіх манеўраў падатковых ў Расеі на эканоміку Беларусі. У коштавым вылічэнні, я ўжо казаў, гэта блізу 400 млн даляраў у гэтым годзе. Пры ВУП больш 50 млрд даляраў, я думаю, мы гэта як-небудзь перажывём».

Але ўвосень тэлеканал «Беларусь 1» у сюжэце з пасяджэння ўрада распавёў аб меркаванні чыноўнікаў: краіна недаатрымала велізарныя грошы за экспарт праз падатковы манэўр у Расеі.

«Брудная» нафта

Вясной беларускія нафтаперапрацоўчыя заводы былі на некаторы час спыненыя праз траплянне «бруднай» нафты. Адпаведна быў прыпынены і экспарт нафтапрадуктаў.

Але ў траўні Дзмітрый Круты заявіў, што Мінэканомікі пакуль не бачыць падстаў для перагляду прагнозу ВУП Беларусі на 2019 год. У тым жа месяцы яго падтрымаў першы віцэ-прэм'ер Аляксандр Турчын:

«Для карэктавання прагнозу росту ВУП пакуль падстаў няма».

Праз два месяцы чыноўнікі змянілі сваю пазіцыю. Круты заявіў, што «брудная» нафта - адзін з аб'ектыўных чыннікаў, якія паўплывалі на нізкі паказчык росту ВУП.

Гэтую пазіцыю падтрымаў Нацбанк.

Увосень тэлеканал «Беларусь 1» перадаў з пасяджэння ўрада: праз «брудную» нафту і падатковы манеўр Беларусь недаатрымала ў экспарце 1,5 мільярда даляраў.

У канцы года ўсё перакінуў на дзеянні Расеі сам Лукашэнка: «А мы ж не выканалі ВУП у асноўным праз нафтавыя праблемы».

Рамонт на «Беларуськаліі»

Яшчэ адным апраўданнем нізкага росту ВУП улады называюць праведзеныя восенню рамонтныя працы на «Беларуськаліі»: другім, трэцім і чацвёртым кіраваннем. Праз гэтага часова знізіўся экспарт калійных угнаенняў - быццам бы на чвэрць.

... Калі сыходзіць са слоў чыноўнікаў, то трэба прагназаваць, што ў новым 2020 годзе беларуская эканоміка ірване ўверх. Таму што рамонты на «Беларуськаліі» закончыліся, Расея павінна расплаціцца за «брудную» нафту, а надвор'е наўрад ці будзе горшым, чым у 2019-м.

Але нешта падказвае, што нашы ўлады зноў знойдуць процьму тлумачэнняў, чаму ВУП не расце.