ДАІ прыдумала для кіроўцаў новую платную паслугу

Пакуль гэта тычыцца толькі Менскай вобласці.

У ДАІ з'явілася магчымасць папярэдняга запісу на рэгістрацыю аўтамабіляў. Праўда, пакуль гэта тычыцца толькі Менскай вобласці, паведамляе tut.by.

- Паслуга ўведзеная ў дзеянне з 9 студзеня 2020 года. Прыём дакументаў для ажыццяўлення адміністрацыйных працэдур, звязаных з рэгістрацыяй транспартных сродкаў, паводле папярэдняга запісу выконваецца на падставе заяўкі, - распавялі ў Дзяржаўтаінспекцыі.

Заяўку можна падаць панядзелкамі з 08.30 да 18.00 у будынку УДАІ УУС Менскага аблвыканкама (вуліца Кальварыйская, 27, кабінет 101) і з аўторка да пятніцы з 08.00 да 17.00 праз тэлефоны: 017 259-61-70 і 017 378-62-98. У ёй трэба паведаміць: назву арганізацыі (прозвішча, імя фізічнай асобы), адрас і колькасць транспартных сродкаў, у дачыненні да якіх будуць ажыццяўляцца рэгістрацыйныя дзеянні.

У прызначаны дзень заказчык павінен падаць усе неабходныя для рэгістрацыі дакументы, у тым ліку дакументы, якія пацвярджаюць ўнясенне аплаты паслугі. Аплатнае даручэнне, выкананае з выкарыстаннем сістэмы электронных плацяжоў, трэба падаваць з адзнакай банка аб іх выкананні. Пры гэтым у адзнацы банка павінны быць дата выканання аплатнага даручэння, арыгінальны штамп банка і подпіс адказнага выканаўцы.

Кошт паслугі за адзін транспартны сродак складае 10 рублёў.