Аляксандр Няўзораў: Вынікам гэтага ўрада ўсё ж стануць лучыны за карткі

Вядомы публіцыст крытычна ацаніў кабінет Мішусціна ў РФ.

- Той, хто спадзяваўся, што ўлада зламаецца, вытхнецца, стоміцца, нарэшце, ад гэтай сваёй страшэннай бітвы са здаровым сэнсам, з развіццём, з сучаснасцю, гэтыя наіўныя дурні пралічыліся, - заявіў вядомы расейскі публіцыст Аляксандр Няўзораў ў эфіры «Эхо Москвы». - Таму што ўлада ў выдатнай форме. Яна вельмі выразна дала зразумець, што яна мерыцца нарасціць як абароты цемрашальства, так і далейшую дэградацыю краіны.

Не выпадкова ключавымі фігурамі сталі самыя лютыя прыхільнікі татальнага кантролю і лімітавай жорсткасці кіравання. Вось не трэба падманвацца шыратой мішусцінскай ўсмешкі і ягонымі нібыта жартачкамі. Гэта яшчэ той монстр.

Монстр, але яшчэ, на жаль, разумны, які ўмее пышна маскавацца і які разумее, што не трэба ўсё адразу выкладваць. Палохаць насельніцтва трэба... як бы ўцягваючы яго ў гэты спалох паступова.

Гэта значыць, трэба разумець, што паступовае і няўхільнае ўдушэнне свабод, надзей і перспектыў абсалютна немінучае Тут уладу можна зразумець. Ніякага іншага спосабу падоўжыць сваё існаванне ў яе няма, акрамя ўзмацнення ціску і ўсякіх там рэпрэсій. Гэтага ніхто асабліва не хавае.

Пры гэтым Няўзораў мяркуе: «Адзінай сацыяльнай праграмай, з дапамогай якой можна перамагчы беднасць, павінен быць не татальны кантроль, а абсалютна татальная фінансавая свабода кожнага».

Публіцыст звярнуў асаблівую ўвагу на прапанову ўнесці ў расейскую Канстытуцыю пункт аб недапушчальнасці двайнога грамадзянства для чыноўнікаў. Ён супрацьпаставіў гэтаму дзеянні Пятра Першага, які сам асабіста доўга жыў у Еўропе, дзе вучыўся рамяству.

Няўзораў мяркуе, што новы пункт у асноўным законе краіны будзе азначаць забарону на «набыццё цывілізацыйнага досведу».

Пры гэтым, на ягоную думку, простых паездак на Захад для чыноўнікаў недастаткова.

- Не, пажыць там - гэта хадзіць па крамах не дзеля ануч, не па Мілану, па Мантэнапалеоне. Гэта хадзіць па бульбу, гэта хадзіць у якія-небудзь муніцыпалітэты і квестуры, гэта стаяць у чэргах, гэта ўмець сартаваць смецце, гэта пазнаёміцца з іх бюракратыяй, гэта пазнаёміцца з іх паліцыяй і звычкамі. Гэта не набываецца турыстам. Гэта магчыма толькі, пражыўшы там пэўны час, - мяркуе Няўзораў.

Публіцыст зрабіў несуцяшальную выснову ў сувязі з апошнімі дзеяннямі расейскіх уладаў:

- Я мяркую, што яны даб'юцца свайго. І вынікам гэтага ўрада ўсё ж стануць лучыны паводле картак.

Нагадаем, што раней новы расейскі прэм'ер Міхаіл Мішусцін блізу 10 гадоў узначальваў Федэральную падатковую службу. Пры ім колькасць падатковых паступленняў у бюджэт павялічылася.

Цікава, што ягоны бацька нарадзіўся ў Полацку, але з паведамленняў СМІ меў не беларускія, а габрэйскія карані.

Пасля прызначэння Мішусціна кіраўніком урада шырока стала вядома, што чыноўнік складае вершы, паэмы і нават напісаў музыку для песень Грыгорыя Лепса.