29 лютага 2020, Субота, 6:57
Засталося зусім крыху
Рубрыкі

«Медыкі заходзяць ледзь не ў адзенні хімічнай абароны»

55
«Медыкі заходзяць ледзь не ў адзенні хімічнай абароны»
Фота: EPA

Што вядома пра стан беларускі, якая трапіла ў інфекцыйную лякарню пасля паездкі ў Кітай.

У менскай інфекцыйнай лякарні знаходзіцца дзяўчына, якая некалькі дзён таму вярнулася з Кітая - там цяпер распаўсюдзіўся новы, раней не вядомы вірус, які выклікае пнеўманію. Ганну забралі ў лякарню з высокай тэмпературай і сімптомамі ВРВІ. Партал tut.by пагаварыў з хворай.

Ганне Ільніцкай 20 гадоў, у Кітаі яна правяла два месяцы - удзельнічала ў мастацкім фестывалі ў Шанхаі. У Менск яна вярнулася 20 студзеня, цяпер знаходзіцца ў гарадской інфекцыйнай лякарні ў Менску.

Пра тое, што Ганну шпіталізавалі з падазрэннем на кітайскі каронавірус, на сваёй старонцы ва "ВКонтакте" напісаў ейны хлопец. Ён пасля вяртання з Кітая таксама апынуўся ў лякарні - у Санкт-Пецярбургу. На сёння, як пішуць РІА "Новости", у яго не знайшлі клінічных і лабараторных прыкмет новага віруса. Аднак дыягнастычныя мерапрыемствы працягваюцца, біяматэрыял адпраўлены ў сертыфікаваную вірусалагічную лабараторыю.

- Цяпер у мяне тэмпература і кашаль. Тэмпературу збіваюць ін’екцыямі, - распавядае Ганна. - Забралі ў лякарню ўчора а пятай вечара з тэмпературай 38,8 градуса. Прымалі дзве з паловай гадзіны. У гадзін сем мяне паклалі ў палату. Хацелі спачатку ў агульную, але потым я стала пярэчыць, маўляў, раптам гэта вірус, заражу ўсіх. Паклалі ў трохасабовую, але пустую, таму я была адная. Пракапалі глюкозу, зрабілі ін’екцыю ад тэмпературы. Раніцай ўзялі кроў. І збілі зноў тэмпературу, якая была 39. Пасля таго, як узялі ўсе аналізы, перавялі ў асобны ізаляваны бокс, і паведамілі, што ў мяне проста грып.

Ганна адзначае, што медыкі заходзяць у яе палату «ледзь не ў адзенні хімічнай абароны».

Прэс-сакратарка Міністэрства аховы здароўя Юлія Барадун пацвердзіла, што ўчора ў Менскую інфекцыйную бальніцу была шпіталізаваная пацыентка са скаргамі на болі ў цягліцах, падвышэннем тэмпературы цела да 38,5°С, кашлем. Папярэдні дыягназ - вострая рэспіраторная вірусная інфекцыя.

Сёння ў лякарні быў праведзены кансіліум з удзелам галоўнага лекара Менскай інфекцыйнай лякарні Мікалая Юроўскім, намеснікам галоўнага лекара ў медыцынскай частцы Святаслава Вельгіна і прафесара, загадчыка кафедры інфекцыйных хвароб БДМУ, доктара медыцынскіх навук Ігара Карпава. Выстаўлены дыягназ, які на сёння ўжо пацверджаны лабараторна - грып В, сярэдняй ступені цяжкасці. Праводзіцца лабараторнае даследаванне для выключэння напластавання каронавіруснай інфекцыі.

Як паведамлялася, улады Кітая 31 снежня 2019 года інфармавалі САЗ пра ўспышку невядомай пнеўманіі ў горадзе Ухань. 7 студзеня кітайскія медыкі ўстанавілі ўзбуджальніка хваробы - каронавірус 2019-nCoV. Выпадкі заражэння пнеўманіяй новага тыпу пацверджаны ў 25 правінцыях, аўтаномных раёнах і гарадах цэнтральнага падпарадкавання Кітая. Агулам 5897 чалавек мелі шчыльныя кантакты з хворымі. Сярод іх 4928 чалавек знаходзяцца пад медыцынскім наглядам, астатнім 969 ён не патрэбны. Інкубацыйны перыяд віруса новага тыпу можа складаць блізу 14 дзён. Акрамя таго, выпадкі заражэння выяўлены ў ЗША, Японіі, Рэспубліцы Карэя, Тайландзе.

Міністэрства аховы здароўя Беларусі адсочвае сітуацыю з каронавірусам новага тыпу ў свеце, узмоцнены прафілактычныя мерапрыемствы для недапушчэння яго распаўсюджвання ў краіне. У аэрапортах узмоцнены санітарна-каранцінны кантроль пасажыраў.

Спецыялісты РНПЦ эпідэміялогіі і мікрабіялогіі пастаянна адсочваюць дынаміку развіцця эпідэмічнай сітуацыі ў свеце і гатовыя да дыягностыкі ўзбуджальніка захворвання паводле метадычным распрацоўкам САЗ.

Вірус 2019-nCoV - варыянт каронавіруса, які дагэтуль не перадаваўся людзям.

Каронавірусы - сямейства вірусаў, якое ўключае 38 відаў, толькі шэсць (а з новым вірусам - сем) з якіх уздзейнічаюць на чалавека.

Даследнікі мяркуюць, што, хутчэй за ўсё, вірус распаўсюдзіўся на людзей ад жывёл, але здольны таксама перадавацца ад чалавека да чалавека.

Сярод сімптомаў заражэння: падвышаная тэмпература, кашаль, абцяжаранае дыханне.

Людзям раяць не дакранацца да жывёл, пазбягаць недаваранага або недасмажанага мяса і яек, а таксама пазбягаць кантакту з людзьмі з сімптомамі прастуды ці грыпу.

У нашай краіне ўзмацнілі прафілактычныя мерапрыемствы, каб не дапусціць распаўсюджвання выяўленага ў Кітаі каронавіруса. Пасажыраў, якія ляцяць з краін, дзе выяўлены вірус, правяраюць у тым ліку з прымяненнем цеплавізійнага абсталявання.

Пасольства Беларусі ў Кітаі дало рэкамендацыі беларусам, якія едуць у гэтую краіну або ў ёй знаходзяцца:

пазбягаць кантактаў з жывёламі, птушкамі;

не наведваць рынкі морапрадуктаў, жывой птушкі і жывёл, фермы;

не есці сырыя або недастаткова тэрмічна апрацаваныя прадукты жывёльнага паходжання, у тым ліку малако, яйкі, мяса, птушку, морапрадукты;

выключыць шчыльныя кантакты з людзьмі з сімптомамі вострых рэспіраторных інфекцый.

Акрамя таго, для прафілактыкі пнеўманіі і іншых рэспіраторных інфекцый раяць:

мыць рукі з вадкім мылам і вадой, выкарыстоўваць антысептычныя сродкі на спіртавой аснове;

праводзіць гігіену рук, асабліва перад дотыкам рота, носа або вачэй, пасля кантакту з аб'ектамі навакольнага асяроддзя (поручнямі, дзвярнымі ручкамі), а таксама пасля кашлю ці чхання;

пры чханні або кашлі прыкрываць рот і нос папяровай сурвэткай.