У Славаччыне міністр спрычыніўся да бойкі ў рэстарацыі і адразу падаў у адстаўку
6- 23.01.2020, 15:17
- 12,497
Чыноўнік публічна папрасіў прабачэння за свае паводзіны.
Славацкі міністр у пытаннях навакольнага асяроддзя Ласла Салімаш абвясціў аб адстаўцы на наступны дзень пасля таго, як паліцыя затрымала яго з братам за бойку ў рэстарацыі.
Пра гэта паведамляе «Еўрапейская праўда» са спасылкай на Aktuality.sk.
«Я папрашу прабачэння ў тых, хто пацярпеў ад маіх паводзін. Я гатовы ўзяць на сябе адказнасць за свой правал. Я сыходжу ў адстаўку», - сказаў ён журналістам.
Паліцыя затрымала Салімаша і ягонага брата ў сераду, а затым адпусціла. Міністр з братам учынілі бойку з персаналам кітайскай рэстарацыі ў Браціславе. Паводле інфармацыі СМІ, яны былі ў стане алкагольнага ап'янення. Пры гэтым Салімаш крычаў, што ён міністр і патрабуе павагі.
У выніку інцыдэнту ў рэстарацыі разбітыя шкляныя дзверы. Шкоду ацанілі на 1000 еўраў. Аднаму з супрацоўнікаў рэстарацыі спатрэбілася тэрміновая медыцынская дапамога і шпіталізацыя, піша Pravda.sk.
Паводле інфармацыі газеты, міністр у гэты час сутыкнуўся са складанай жыццёвай сітуацыяй.
Партыя Most-Híd, якую прадстаўляе Салімаш, заявіла, што шкадуе пра інцыдэнт.
«Мы ведаем, што Ласла Салімаш перажывае адзін з самых складаных момантаў свайго жыцця. Акрамя таго, што мы палітыкі, мы таксама і людзі», - заявіла прэс-сакратарка партыі Клара Магдэмэ.
Супраць палітыка і ягонага брата распачалі справу на падставе артыкулаў аб хуліганстве і прычыненні маёмаснай шкоды.