Жыхар ПАР дзеля рэкорду пасяліўся ў бочцы

Каб ускладніць задачу, «дыяген» падняў ёмістасць на вышыню 25 метраў над зямлёй.

Жыхар Паўднёва-Афрыканскай рэспублікі Вернан Кругер плануе ўстанавіць незвычайны рэкорд. Мужчына мае намер як мага даўжэй пражыць у бочцы, піша «Вокруг света».

У новым «жыллі» ён прасядзеў ужо 68 дзён, тым самым перасягнуўшы свой асабісты рэкорд - у 1997 годзе ён правёў у бочцы 54 дні.

Кругер вядзе актыўнае жыццё: раздае інтэрв'ю шматлікім журналістам, а таксама актыўны ў сацыяльных сетках, бо час ад часу ладзіць з бочкі жывыя эфіры.

Самым складаным у незвычайным жытле, са слоў будучага рэкардсмена, з'яўляецца сон у бочцы. «Я не магу выцягнуцца і павінен ляжаць у позе эмбрыёна. Але нават гэта практычна немагчымае, бо прастора сапраўды малюсенькая... Я прачынаюся ад болю», - падзяліўся ён.