Журналістам з пула Лукашэнкі спецыяльна сказалі апублікаваць абразы на адрас Барозу

Дзяржаўныя СМІ былі ўпэўненыя, што словы дыктатара - проста эмоцыі.

Цікавы момант з інтэрв'ю былога супрацоўніка дзяржгазеты, які раней працаваў у пуле Лукашэнкі.

- Часам прасілі нейкія рэчы не даваць у эфір, напрыклад, асабістыя спрэчкі на нарадах са службовымі асобамі, сваркі. Ці вельмі адкрытыя пытанні маглі абмяркоўвацца, напрыклад, узаемастасункі з Расеяй. Тады нам казалі: вось гэта апускаем, - распавёў суразмоўца tut.by. - А бывала, што прасілі нейкія эмацыйныя рэчы, наадварот, даваць у эфір - і гэта выклікала здзіўленне. Узгадайце, як Лукашэнка назваў кіраўніка Еўрапейскай камісіі Жазэ Барозу «казлом». Мы былі ўпэўненыя, што Лукашэнка выказаўся на эмоцыях у вузкім коле. Але не, нам сказалі публікаваць.

Нагадаем, у красавіку 2011 года СМІ абляцела цытата, сказаная Лукашэнкам на адрас кіраўніка Еўрапейскай камісіі Жазэ Мануэля Барозу.

- Што тычыцца такіх казлоў, як Барозу і іншых...Ну, хто такі Барозу? Быў нейкі Барозу ў Партугаліі, але выгналі яго і ўладкавалі ў Еўракамісію. Я менш за ўсё гляджу, што дзе хто ляпнуў з еўрапейскіх чыноўнікаў. Іх там тысячы, - заявіў Лукашэнка.

І пракаментаваў спробы ўвядзення эканамічных санкцый супраць Беларусі:

- Проста нягоднікі. Таму я не хачу гаварыць аб усякіх Барозу, іншых «казлах», «быках» і іншых...