Расеі прадказалі застой і новую дэвальвацыю рубля

За чатыры гады курс даляра вырасце на 21%.

Расейская эканоміка ў найбліжэйшыя чатыры гады працягне расці ўдвая павольней за сусветную і сутыкнецца з прыкметным падзеннем курсу рубля, прагназуе міжнароднае рэйтынгавае агенцтва S&P, піша finanz.ru.

Пацвердзіўшы суверэнны рэйтынг РФ на ўзроўні ВВВ -, ніжэйшай ступені інвестыцыйнай катэгорыі, агенцтва пакінула ў сіле «стабільны» прагноз па ім, які не прадугледжвае павышэння ў найбліжэйшыя 24 месяцы.

Нягледзячы на кансерватыўную грашова-крэдытную палітыку, якая дазволіла запаволіць інфляцыю, нізкую замежную запазычанасць і гіганцкія валютныя рэзервы, расейская эканоміка застаецца «структурна слабой»: экспартныя даходы трывала завязаныя на продаж замежжу нафты і газу, узровень канкурэнцыі і інавацый застанецца нізкім, рэгулятыўнае асяроддзе - неспрыяльным, доля дзяржавы працягвае павялічвацца, а санкцыі і доўгатэрміновыя дэмаграфічныя праблемы - абмяжоўваць перспектывы росту, канстатуе S&P. Паводле вынікаў 2019 года расейскі ВУП, паводле ацэнцы агенцтва, дадаў 1,3%. Сёлета рост паскорыцца да 1,8%, але гэты ўзровень стане планкай, пераскочыць якую эканоміка не зможа на ўсім гарызонце прагнозу (да 2023 года), мяркуе S\u0026 P.

Нацыянальныя праекты за 25 трыльёнаў рублёў, прафінансаваныя павышэннем ПДВ і пенсійнай рэформай, будуць не ў стане паскорыць эканоміку да жаданых 3%: тормазам для інфраструктурных праектаў можа стаць канфлікт інтарэсаў, а акрамя таго, анансаваныя меры «толькі ў некаторай ступені» накіраваныя на развязанне структурных праблем, дыпламатычна канстатуе S&P: сярод іх - недастатковая незалежнасць судовай сістэмы, выбіральнасць правапрымянення і слабая сістэма дзяржкіравання.

Змена ўрада наўрад ці нешта памяняе: кабінет Міхаіла Мішусціна «на думку агенцтва, «захавае пераемнасць» палітыкі, у цэнтры якой застаецца напаўненне бюджэту і золатавалютных рэзерваў краіны.

І хоць гэты падыход робіць расейскія каштоўныя паперы прывабнымі для замежных інвестараў, а назапашаная «падушка» дазваляе ўраду прафінансаваць абавязанні дзяржкарпарацый у выпадку крызісу, «плаціць» даводзіцца застоем рэальнага сектара і сцісканнем магчымасцяў спажыўцоў.

Паводле прагнозу S&P, на 2023 год расейскі ВУП у даляравым выразе будзе заставацца на 14% ніжэй за ўзровень 2014-га - 1,786 трлн даляраў супраць 2,082 трлн. Узровень жыцця, вымераны ВУП на душу насельніцтва, таксама застанецца прыкметна ніжэйшым за дакрызісны - 12,2 тысячы даляраў супраць 14,2 тысячы.

Пазбаўлены апоры на эканамічны рост зноў пачне слабець рубель: за 4 гады курс даляру вырасце больш чым на 20%, прагназуе S&P.

На канец 2020 года даляр будзе каштаваць 66,5 рубля, праз год падаражэе да 70 рублёў, 2022-ы скончыць на адзнацы 72 рублі, а ў 2023-м праб'е ўзровень 74 рублі, вынікае з ацэнак агенцтва.

У свае прагнозы S&P закладвае плаўнае зніжэнне коштаў нафты з існых 65 даляраў за барэль да 60 даляраў сёлета і 55 даляраў – у 2021-м.

Перспектывы рубля і расейскай эканомікі азмрочвае рызыка ўзмацнення жорсткасці санкцый, якая вырасла пасля таго, як у снежні камітэт Сената ЗША ў міжнародных стасунках ухваліў «Акт аб абароне бяспекі ЗША ад агрэсіі Крамля», які прадугледжвае дадатковыя абмежаванні супраць расейскай дзяржаўнай пазыкі, банкаў і энэргетычных праектаў.

«Нягледзячы на тое, што дакладныя тэрміны ўступлення гэтага закона ў дзеянне застаюцца нявызначанымі, а таксама тое, што адміністрацыя ЗША выступае супраць яго прыняцця, мы ўважаем, што падобнае развіццё падзей сведчыць пра захаванне напружанасці ў стасунках паміж Расеяй і ЗША, а таксама аб істотных рызыках увядзення дадатковых санкцый, асабліва ў кантэксце маючай адбыцца перадвыбарнай прэзідэнцкай кампаніі ў ЗША», - папярэджвае S&P»