Трамп адмовіўся ад перамоваў з Іранам на ўмовах зняцця санкцый

Прэзідэнт ЗША адказаў кіраўніку МЗС Ісламскай Рэспублікі.

Прэзідэнт ЗША Дональд Трамп не падтрымаў заклік Ірана правесці перамовы пры ўмове зняцця санкцый. Пра гэта ён заявіў у Twitter, паведамляе РБК.

«Міністр замежных справаў Ірана заявіў, што Іран хоча весці перамовы са Злучанымі Штатамі, але пасля зняцця санкцый. Не ўжо, дзякуй!» – напісаў Трамп.

Раней кіраўнік МЗС Ісламскай Рэспублікі Мухамед Джавад Зарыф у інтэрв'ю часопісу Der Spiegel не выключыў магчымасці перамоваў з Вашынгтонам пры ўмове, што адміністрацыя Трампа «выправіць свае паводзіны і скасуе санкцыі».

Сітуацыя на Блізкім Усходзе абвастрылася пасля ракетнага ўдару ЗША па раёне аэрапорта ў Багдадзе падчас спецаперацыі ЗША ў ліквідацыі ўплывовага іранскага генерала Касэма Сулеймані. У адказ Тэгеран 8 студзеня атакаваў амерыканскую базу і аэрапорт у Іраку, у выніку чаго, паводле звестак Пентагона, пацярпелі больш за 30 вайскоўцаў.

Пасля гэтага ЗША заявілі, што ўвядуць супраць Ірана сектаральныя санкцыі, якія закрануць здабыўны сектар эканомікі, будаўніцтва, вытворчасць металу і тэкстылю.