Дырэктар генеральнага спонсара ФК «Гарадзея» Міхаіл Крыштаповіч быў зняты з авіярэйса «Менск-Мюнхен»

Афіцыйнай інфармацыі пра прычыны здарэння пакуль няма.

24 студзеня ў Гародні зрабіў экстранную пасадку авіялайнер, які рухаўся маршрутам Менск - Мюнхен.

Як паведамілі СМІ, борт кампаніі «Белавія» развярнулі над Польшчай, пасля ён вярнуўся ў беларускую паветраную прастору. Здарэнне спачатку патлумачылі тэхнічнымі непаладкамі, аднак затым прыбылі памежнікі і знялі з рэйса шэсць чалавек. З ручной паклажай і багажом. Пасля гэтага самалёт зноў узяў першапачатковы курс і даставіў пасажыраў да месца прызначэння з затрымкай некалькі гадзін.

Onliner.by са спасылкай на аднаго з відавочцаў піша: «Увайшлі людзі ў зялёнай форме - хутчэй за ўсё, памежнікі. Яны выклікалі некалькі пасажыраў (шасцярых: двое з адной сям'і, чацвёра - з іншай, калі не памыляюся), вывелі іх з рэчамі на вуліцу. Абшукалі месца, дзе тыя сядзелі. <...> Пасажыраў, якім трэба было выйсці, называлі па прозвішчы. Магчыма, гэта былі муж з жонкай і іх бацькі. Быццам бы выводзілі яшчэ чатырох людзей, але іх потым вярнулі (магчыма, яны былі з маленькімі дзецьмі, але я не ўпэўнены). Выглядалі яны сумнымі, што натуральна, але і ў істэрыцы не біліся. Двое былі з адным прозвішчам, чацвёра з другім. Усе названыя людзі перад рэйсам сядзелі разам вялікай кампаніяй, па-мойму, выпілі нават па куфлі шампанскага. Але п'янымі яны не былі».

Паводле паведамлення крыніцы партала, людзі ў форме ў дачыненні да згаданых шасцярых пасажыраў называлі два прозвішчы - Руднік і Крыштаповіч.

Са звестак pressball.by, атрыманых з некалькіх крыніц, сярод грамадзян, знятых з рэйса на Мюнхен, знаходзіцца Міхаіл Крыштаповіч. Гэта дырэктар ТАА «Гарадзейскі цукровы камбінат» - генеральнага спонсара футбольнага клуба «Гарадзея». 63-гадовы Міхаіл Васільевіч - вялікі прыхільнік футбола, пад’ём каманды з пасёлка Нясвіжскага раёна да элітных вышынь трэба ў першую чаргу звязваць з падтрымкай узначаленага ім прадпрыемства.

Афіцыйнай інфармацыі пра прычыны здарэння пакуль няма.