Пяскоў: Суркоў дэ-факта застаецца памочнікам Пуціна
8- 27.01.2020, 14:30
- 11,515
У Крамлі агучылі пазіцыю аб звальненні «шэрага кардынала».
Прэс-сакратар прэзідэнта РФ Дзмітрый Пяскоў заявіў, што Уладзіслаў Суркоў пакуль дэ-факта застаецца памочнікам Уладзіміра Пуціна.
Са слоў Пяскова, указа аб вызваленні Суркова ад ягоных абавязкаў пакуль не было.
«Таму сітуацыя дэ-факта застаецца такая, што ён пакуль працягвае заставацца памочнікам прэзідэнта Расейскай Федэрацыі», - цытуе Пяскова ТАСС.
Адказваючы на пытанне, ці з'яўляецца Суркоў на сваім працоўным месцы, Пяскоў адзначыў наступнае:
«Дакладна не магу сказаць, я функцыі кантролю за наведвальнасцю працоўнага месца не ажыццяўляю».
25 студзеня стала вядома, што памочнік прэзідэнта Расеі Уладзіслаў Суркоў сыходзіць з дзяржаўнай службы. Пра гэта паведаміў набліжаны да яго расейскі палітолаг Аляксей Часнакоў.
Са слоў Часнакова, пастанова аб адстаўцы была прынятая Сурковым праз «змену курсу на ўкраінскім кірунку». У той жа час прэс-сакратар прэзідэнта РФ Дзмітрый Пяскоў заяўляў, што указа аб адстаўцы Суркова яшчэ няма.
Пяскоў таксама зняпраўдзіў інфармацыю пра «змену курсу на ўкраінскім кірунку».
Суркоў адказваў за фармаванне палітыкі ў дачыненні да Украіны і супрацоўніцтва з Абхазіяй і Паўднёвай Асеціяй. Чыноўніка часам называлі «архітэктарам» вайны на Данбасе і галоўным ідэолагам стварэння тэрарыстычных утварэнняў «ДНР» і «ЛНР» на ўсходзе Украіны.