Руднік збіраецца спагнаць €5,2 мільёна з медый за інфармацыю пра ягонае затрыманне

Кіраўнік «Магілёўхімвалакно» правёў нараду на прадпрыемстве.

На tut.by зняпраўдзілі інфармацыю аб зняцці з рэйса Менск - Мюнхен і затрыманні генеральнага дырэктара прадпрыемства Пятра Рудніка, якую распаўсюджвалі ў выхадныя ў медыяпрасторы. Кіраўнік прадпрыемства знаходзіцца на працоўным месцы.

Гаворка ідзе пра самалёт, які вылецеў з затрымкай на 3 гадзіны з Менска ў Мюнхен ў пятніцу, 24 студзеня. Самалёт быў ужо ў паветранай прасторы Польшчы, калі ён развярнуўся і вярнуўся ў Беларусь. З паведамленняў пасажыраў, пры пасадцы ў Гародні з борта знялі шэсць чалавек.

Шэраг медыярэсурсаў распаўсюдзілі інфармацыю, нібыта ў ліку тых, каго знялі з борта і затрымалі, быў генеральны дырэктар «Магілёўхімвалакно» Пётр Руднік. Гэтая інфармацыя не адпавядае рэчаіснасці, растлумачыў намеснік гендырэктара ў ідэалагічнай працы, кіраванні персаналам і сацыяльных пытаннях прадпрыемства Віталь Зянькоў.

Віталь Зянькоў распавёў, а іншыя супрацоўнікі прадпрыемства пацвердзілі, што ў пятніцу Пётр Руднік быў на працоўным месцы як мінімум да 17.20. У суботу, 25 студзеня, ён удзельнічаў як звычайна ў нарадзе з канцэрнам «Белнафтахім» праз відэасувязь.

- Сёння, у панядзелак, Пётр Міхайлавіч правёў планавую ранішнюю нараду а 9 раніцы, - дадаў Зянькоў.

Пётр Руднік распавёў tut.by, што ні ў яго, ні ў ягонай жонкі няма шэнгенскай візы, а таму ён не мог знаходзіцца на борце самалёта, які рухаўся з Менска ў Мюнхен.

За публікацыю «недакладнай інфармацыі, здольнай нанесці шкоду рэпутацыі прадпрыемства і аўтарытэту яго кіраўніка», Руднік даручыў спагнаць са СМІ, якія яе распаўсюдзілі, 5,2 млн еўраў на карысць мадэрнізацыі вытворчасці тэхнічных нітак.

У дачыненні да якіх медыя будуць пададзеныя позвы, на «Магілёўхімвалакне» пакуль не паведамляюць.