Прэзідэнтам ПАРЕ стаў прадстаўнік Бельгіі
- 27.01.2020, 16:42
- 9,496
Рык Дамс абраны тэрмінам на адзін год.
Новым прэзідэнтам Парламенцкай асамблеі Рады Еўропы стаў прадстаўнік Бельгіі Рык Дамс. Адпаведная пастанова была прынятая падчас адкрыцця зімовай сесіі Асамблеі ў Страсбургу, паведаміла прэс-служба ПАРЕ ў Twitter, піша «Гордон».
«Віншуем Рыка Дамса з Бельгіі, толькі што абранага старшынём Парламенцкай асамблеі на адзін год, з магчымасцю падаўжэння», - гаворыцца ў паведамленні.
Дамс заменіць на гэтай пасадзе Ліліян Моры Паск'е. На сваёй старонцы ў Facebook ён адзначыў, што яго абралі кіраўніком ПАРЕ аднагалосна.
«Я прыкладу ўсе намаганні для ўмацавання правоў чалавека і дэмакратычнай канстытуцыйнай дзяржавы на еўрапейскім кантыненце», - дадаў ён.
Congratulations to Rik Daems from Belgium, just elected as President of the Parliamentary Assembly for a one-year term, renewable! pic.twitter.com/lUENor4ubX
— PACE (@PACE_News) 27 જાન્યુઆરી, 2020
«Еўрапейская праўда» піша, што Дамс працуе ў ПАРЕ з 2007 года з перапынкам з лістапада 2010 да лістапада 2014 года.
«Ён даволі непублічны дэпутат і не занадта вядомы за межамі сваёй групы. Таксама вельмі характэрныя ягоныя галасаванні што да ўкраінскіх пытанняў. Хоць дэпутат прысутнічаў у асамблеі падчас крытычна важных галасаванняў - напрыклад, у абскарджанні паўнамоцтваў дэлегацыі Расеі ў 2015 годзе, - ён не стаў аддаваць свае галасы ні за, ні супраць украінскіх прапаноў. У далейшым ён таксама не галасаваў за большасць рэзалюцыяў што да Крыму і Данбасу, аддаўшы галасы толькі за адну з іх - аб гуманітарнай сітуацыі ва Украіне, у студзені 2015 года. Што да астатніх «украінскіх» дакументаў, то ягоныя галасы ў электроннай сістэме адсутнічаюць», - адзначае выданне.
Улетку 2019 года, калі развязвалася пытанне аб «прабачэнні» Расеі і яе вяртанні ў ПАРЕ, Дамс наважыў узяць удзел у галасаванні, але націснуў кнопку «ўстрымаўся».