«Праспяваю вам і паеду ў вёску печку паліць»
8- 28.01.2020, 9:13
- 27,517
Каго абралі на «Еўравізію-2020» ад Беларусі.
У Белтэлерадыёкампаніі праслухалі 49 кампазіцый – і 40 з іх былі на ангельскай, адна на французскай, а Аўра праспявала «Баранi сваё». У выніку фіналістаў засталося 12, піша kp.by.
Сёлета ўсіх фрыкаў пакінулі за рамкамі адбору, таму праслухоўванне ў Белтэлерадыёкампаніі было дастаткова спраўным і дынамічным. Зрабілі сёлета і добрую карцінку онлайн-вяшчання на сайце tvr.by.
У журы паклікалі Георгія Калдуна, удзельніцу «Еўравізіі» мінулага года Зену, дуэт NaviBand (праўда, з правам аднаго голасу), прадусара групы Las Vegas Яну Станкевіч і іншых. З выразу іх твараў было вельмі складана зразумець, якія выканаўцы ім падабаюцца. Зрэшты, Зена раз-пораз пачынала падтанцоўваюць на сваім месцы, было відаць, што на сцэне ёй больш камфортна, чым у крэсле журы.
– Нам нельга загадзя нічога апавядаць, – прызналася Ксенія Жук з NaviBand.
Адным з першых выйшаў на сцэну Віталь Артыст і выканаў сваю «Адным сонцам», якую напісаў спецыяльна для конкурсу.
– Ды я проста забаўляюся, – засмяяўся Віталь. – Мне хацелася паўдзельнічаць у гэтым конкурсе дзесяць гадоў, і ў выніку напісаў песню. Пакуль чакаў праслухоўвання, ужо перагарэў і нават быў гатовы адмовіцца, але мая мама і калегі сказалі: ды схадзі ты на гэты конкурс і закрый гештальт. Вось праспяваю і паеду печку паліць у вёсцы – у мяне там куча справаў.
У кулуарах мы выявілі ўдзельніка расейскага «Голасу» Габрыэля Купатадзэ. Ён быў настроены цвёрда:
– Ды колькі можна вяртацца ні з чым?! Паедзем, пераможам і прывязем «Еўравізію» ў Беларусь. Час нам перамагаць! Я сюды прыйшоў па гэта, а не каб з’явіцца на тэлевізіі раз на год. Песня «Серабро» была напісаная тры гады таму, але я яе нідзе не паказваў. Песня пра сівізну ў валасах і мой узрост, у гэтым амплуа я адчуваю сябе найбольш натуральна.
На сцэне Габрыэль уваліў такі рок, што іншыя канкурсанты, якія назіралі за падзеямі, пачалі прытанцоўваць.
Самыя палымяныя артысты адбору – Анжаліка Пушнова і Віталь Варанко. Убачыўшы нас, адразу папярэдзілі, што спяваць яны збіраюцца паасобку.
– Сёння ў мяне будзе іншая дзяўчына на бэк-вакале – Аксана Вайтовіч, – сказаў чалавек-баян Віталь Варанко. – Мы з Аксанай пазнаёміліся на канцэрце ў Піцеры, дзе яна спявала, а ў мяне быў канцэрт з квартэтам віяланчэляў. Там у грымёрцы і дамовіліся выступіць разам для «Еўравізіі».
Анжаліку Пушнову гледачы ведаюць больш як рэпарцёрку АНТ.
– Ну а тут і сёння я больш спявачка, – засмяялася дзяўчына. – Ува мне гэтыя грані лёгка спалучаюцца. Люблю і з людзьмі мець зносіны, і спяваць. Так што адчуваю сябе зусім камфортна.
У гэты час на сцэну выйшаў гурт Absolem Clоud з мелодыкай (гэта такі клавішны інструмент на губной цязе) і выдаў цалкам стыльную кампазіцыю It's ok у стылі 80-х. Яшчэ б голас вакаліста сказіць і зрабіць механічным – але, на жаль, на «Еўравізіі» голас павінен быць жывым.
У кулуарах вельмі гучна і заўзята распяваліся з бэк-вакалісткамі Каця і Вольга (яна ж Volga) Кароль. Блізняткі выступалі ў «Вечаровм Урганце», здымаліся ў расейскім кіно, а цяпер надумалі выпрабаваць свае сілы ў вакальным майстэрстве. Праўда, на сцэне іх галасы крыху згубіліся на фоне прафесійных бэк-вакалістак, так што журы нават папрасілі дзяўчатак праспяваць а капэла, але ўдзвюх, дуэтам. Атрымалася няблага.
Адна з фаварытак конкурсу – група Aura. Юлія Быкава выйшла на сцэну з квартэтам бэк-вакалістаў і дударом.
– Ну а мы зноў будзем спяваць на беларускай, – сказала Юлія. А голас за кадрам заўважыў, што яна ўдзельнічае ў нацыянальным адборы ўжо 12-ы раз. У нас няма падставаў не верыць – хоць да гэтага меркавалася, што рэкардсменка Гюнэш (у гэтым годзе не ўдзельнічае). Aura выканала баявік «Баранi сваё», якому, як нам здалося, не хапала трохі разынак – больш магутных барабанаў, бабуляў, накшталт «Буранаўскіх», на бэк-вакале. Глядзелася б цікава.
– Ну што, будзем рабіць перапынак, каб вушкі прачысціць? – запыталіся ў журы. Журы надумала перадыхнуць 20 хвілінаў, калі колькасць удзельнікаў пераваліла за экватар. У цэлым праслухоўванне прайшло дынамічна, усяго за 3,5 гадзіны.
А вось і імёны 12 фіналістаў, якіх выбрала журы:
1. Настасся Гламазда – «Burning again»,
2. Дар'я Хмяльніцкая – «On Fire»,
3. AURA – «Барані Сваё»,
4. Валерыя Грыбусава, Уладзіслаў Пашкевіч (VAL) – «Ды вiдна»,
5. Анжаліка Пушнова – «True Love»,
6. NAPOLI – «Dоn't let me down»,
7. Аляксандра Захарык (Саша Захарык) – «Rocky Road»,
8. КейСі – «Chili Pepper»,
9. Ян Яраш – «Fire»,
10. Анастасія Развадоўскі – «Hello»,
11. CHAKRAS – «La-ley-la»,
12. Анастасія Вахомчык (Анастасія Малашкевіч) – «Invisible».