Лукашэнка запатрабаваў ад Віцебскай вобласці вярнуць $1,5 мільярда

Дыктатар заявіў, што запазычанасці павінны пачаць вяртаць ужо налета.

У Віцебскай вобласці назапасіліся сур'ёзныя запазычанасці ў сферы аграпрамысловага комплексу, але што з імі рабіць - пакуль не вызначылі. Лукашэнка запатрабаваў так ці інакш грошы вярнуць, паведамляе прэс-служба дыктатара.

Паводле слоў прэм'ер-міністра Сяргея Румаса, аграпрамысловы комплекс Віцебскай вобласці назапасіў пазык на 3 млрд рублёў. Спецыялісты прапрацоўвалі розныя варыянты, што рабіць з гэтай запазычанасцю, але да адзінай высновы пакуль не прыйшлі.

- Пры ўсёй макраэканамічнай стабільнасці ў нас праблем у эканоміцы дастаткова, таму трэба зыходзіць з гэтага, - падкрэсліў Лукашэнка. - Ці пакідайце гэтыя пазыкі ў калгасах і саўгасах (мы іх адтэрмінуем, і банкі будуць на іх у перыяд адтэрміноўкі нармальна глядзець, а не каэфіцыенты лічыць), ці ж мы перададзім гэтыя пазыкі галаўному прадпрыемству, ці ж акумулюем у агенцтве (сярод прапаноў - стварыць арганізацыю ў кіраванні пазыкамі. - Заўвага рэдакцыі).

Дыктатару прапанавалі вырабіць «тэхнічную расчыстку» балансаў прадпрыемстваў, каб у іх на балансах не ўтваралася пазык. Гэта дазволіць аўтаматычна палепшыць каэфіцыенты платаздольнасці прадпрыемстваў, яны стануць больш прывабнымі пазычальнікамі.

- Прапрацоўваецца пытанне (калі гэта магчыма) у агенцтве сканцэнтраваць пазыкі, - сказаў Лукашэнка. - Але абавязкова яны (прадпрыемствы. - Заўвага рэдакцыі) хоць па цэнту, па рублю павінны плаціць. Няхай гэты год мы ім скажам: давайце паглядзім, як будзеце працаваць, чапаць не будзем. З 1 студзеня наступнага года яны хоць рубель павінны плаціць, яны павінны ведаць, што ў запазычанасцях трэба разлічвацца, ніякага спісання!

Лукашэнка нагадаў, што цяпер Беларусь губляе вялікія грошы на фоне падатковага манеўру ў Расеі, таму вельмі важна шукаць рэзервы на ўсіх кірунках.

- Пытанне ў выратаванні вобласці і сялян. А каб іх выратаваць, іх трэба там аб'яднаць і прымусіць працаваць. І заплаціць ім грошы. І сказаць, што малако і мяса сёлета, кроў з носу, вы павінны на галаўное прадпрыемства паставіць. Ці не? Вайна ідзе, а вы балбатнёй займаецеся, - раскрытыкаваў становішча спраў Лукашэнка.

«Сёння, мужыкі, сітуацыя ўжо не тая»

Дыктатар папярэдзіў, што не трэба разлічваць толькі на фінансавую падтрымку прадпрыемстваў з боку дзяржавы. Нават пры яе наяўнасці не ўдасца развязаць шматлікія праблемы, калі не навесці парадак і дысцыпліну.

- Прывядзіце ў парадак тое, што ёсць: базу, машынныя двары, комплексы, збожжатокі, фермы. Прымусьце людзей своечасова прыходзіць і сыходзіць з працы і выконваць свае функцыянальныя абавязкі, - падкрэсліў Лукашэнка.

У якасці прыкладу ён прывёў сітуацыю з паморакам жывёлы. Асноўная адказнасць за гібель жывёлы ляжыць на работніках прадпрыемстваў. «Гэта не справа, што мы 92 тысячы галоў жывёлы загубілі агулам у краіне!» - сказаў дыктатар.

- Сёння павінна быць самая жорсткая тэхналагічная дыктатура і дысцыпліна, - падкрэсліў Лукашэнка. - Сёлета подзвігі будзем здзяйсняць з тымі людзьмі, якія ў нас ёсць і на той базе, якая ў нас створаная ў Віцебскай вобласці.

- Калі вы думаеце, што ў нас ёсць шалёныя грошы, якія мы будзем выкідаць на Віцебскую вобласць, - не. Сёння, мужыкі, сітуацыя ўжо не тая. Дваццаць гадоў таму, вы памятаеце, было па-іншаму: жэрці не было чаго, тады літр малака быў шчасцем. Цяпер малака, мяса - няма куды падзець у краіне. І ніхто на вас маліцца не будзе, - сказаў дыктатар.