Кошт золата вырас да максімуму за шэсць гадоў

На гэтым фоне даражэюць акцыі золатаздабывальных кампаній.

Золата падаражэла да самага высокага ўзроўню за апошнія шэсць гадоў на фоне росту напружанасці на Блізкім Усходзе пасля забойства іранскага генерала Касема Сулеймані ў сталіцы Ірака. Пра гэта піша агенцтва Bloomberg.

Кошт золата на таргах у Лондане падняўся на 2,3% і дасягае 1588,13 даляра за ўнцыю - гэта максімум з красавіка 2013 года.

Акрамя таго, кошт паладыю падскочыў на 1,2% - да 2 073,90 даляраў за ўнцыю, што з'яўляецца рэкордна высокім паказчыкам.

Срэбра і плаціна таксама выраслі ў цане.

Рост коштаў, акрамя геапалітычных чыннікаў, абумоўлены слабым далярам, нізкімі рэальнымі стаўкамі і наступствамі гандлёвай вайны для стрымлівання сусветнага росту, адзначае агенцтва.

На гэтым фоне даражэюць акцыі золатаздабывальных кампаній.