БАТЭ завяршыў фармаванне трэнерскага штаба

У яго ўвайшоў замежнік.

Трэнерскі штаб БАТЭ цалкам укамплектаваны, паведамляе сайт клуба. У яго ўвайшоў 31-гадовы серб Лука Яўтовіч, які будзе трэнерам-аналітыкам. Таксама новаму галоўнаму трэнеру Кірылу Альшэўскаму будзе дапамагаць спецыяліст, які перайшоў з «Віцебску».

У будучыні сезоне з Кірылам Альшэўскім будзе працаваць пяць чалавек. Старшым трэнерам застанецца Аляксандр Лісоўскі, з брамнікамі працягне працаваць Андрэй Дрозд.

Ёсць і трое пачаткоўцаў.

Дзмітрый Ліхтаровіч - знакавы футбаліст у гісторыі БАТЭ - пасля завяршэння гульнявой кар'еры дапамагаў трэніраваць дубль барысаўчан з 2016 да 2019 года. Яго майка вісіць пад скляпеннямі «Барысаў-Арэны».

Яўген Чарнухін летась дапамагаў Сяргею Ясінскаму ў галоўнай камандзе «Віцебску», а таксама кіраваў рэзервістамі паўночнікаў. У дадатак у прафайле Яўгена Юр'евіча ёсць перыяд у «Тосна» (2018), які тады выступаў у расейскай прэм'ер-лізе.

Пасаду трэнера-аналітыка заняў серб Лука Яўтовіч. Гэты спецыяліст апошнім часам сумяшчаў працу ў Бялградскім «Вождовацы» і моладзевай зборнай сваёй роднай краіны.

Ён таксама прыцягваўся ў якасці экспэрта да эфіраў на сербскай тэлевізіі і дапамагаў разбіраць матчы фінальнага турніру чэмпіянату свету ў футболе ў 2018 годзе.