Шэраг гульцоў хакейнага менскага «Дынама» здаў станоўчы тэст на COVID-19

Каранавірус падазраюць і ў трэнераў.

Старшыня федэрацыі хакея Беларусі і кіраўнік назіральнай рады ХК «Дынама-Мінск» Дзмітрый Баскаў выведзе менскае «Дынама» на матч КХЛ у ролі галоўнага трэнера ў чацвер вечарам праз падазрэнні на каранавірус у трэнераў і гульцоў каманды.

«Дзмітрый Баскаў выведзе менскае «Дынама» на матч у якасці галоўнага трэнера. Ужо сёння ўвечары кіраўніка назіральнай рады клуба чакае вымушаны дэбют у КХЛ у якасці трэнера», - паведамілі ў прэс-службе беларускага клуба.

Як высветлілася напярэдадні матчу, па прыездзе ў сталіцу Латвіі ва ўсіх чальцоў менскага клуба былі ўзятыя тэсты на каранавірусную інфекцыю. «У шэрагу гульцоў і прадстаўнікоў адміністрацыйна-трэнерскага штаба тэсты паказалі першасна станоўчы вынік на каранавірус, што робіць іх удзел у матчы немагчымым», - растлумачылі ў менскім клубе.