У ЗША зменяць фармат наступных дэбатаў Трампа і Байдэна

У фармат дэбатаў унясуць дапаўненні, каб упарадкаваць дыскусіі.

У ЗША наважылі змяніць фармат пакінутых двух раундаў дэбатаў паміж дзейным прэзідэнтам краіны Дональдам Трампам і ягоным апанентам, былым віцэ-прэзідэнтам Джо Байдэнам. Пра гэта паведаміла Камісія ў прэзідэнцкіх дэбатах 30 верасня.

Папярэднія дэбаты паказалі неабходнасць унясення дапаўненняў у фармат наступных дыскусій, каб «забяспечыць больш спарадкаванае абмеркаванне пытанняў», заявілі ў камісіі.

Дапаўненні паабяцалі ўважліва разгледзець і неўзабаве абвясціць.

Камісія падзякавала за прафесіяналізм і навыкі амерыканскаму тэлевядоўцу на канале Fox News Крысу Уолесу, які быў мадэратарам першых дэбатаў Трампа і Байдэна.

Трамп і Байдэн балатуюцца на пасаду прэзідэнта ЗША (Трамп - ад Рэспубліканскай партыі, Байдэн - ад Дэмакратычнай). 29 верасня яны правялі першы з трох раундаў дэбатаў.

Палітыкі казалі аб выніках сваёй працы, прызначэнні суддзі Вярхоўнага суда ЗША, пандэміі каранавіруснай інфекцыі COVID-19, эканоміцы, расавых пытаннях і гвалце ў амерыканскіх гарадах, аб абароне выбарчага працэсу.

Апытанне CBS News паказала, што пераможцам дэбатаў Байдэна ўважаюць 48% гледачоў, Трампа - 41%. Паводле звестак апытання тэлеканала CNN супольна з кампаніяй SSRS, шэсць з дзесяці назіральнікаў за дэбатамі сказалі, што Байдэн лепш справіўся з пытаннямі, і толькі 28% сказалі, што лепшым быў Трамп.

Другія дэбаты адбудуцца 15 кастрычніка ў Маямі (штат Фларыда), а трэція - у Нэшвіле (штат Тэнэсі) 22 кастрычніка, вынікае з раскладу дэбатаў.

Выбары прэзідэнта ЗША адбудуцца 3 лістапада.