Замежныя інвестыцыі ў Расею абрынуліся ў пяць разоў

Рэальны сектар расейскай эканомікі застаецца таксічным у вачах замежнікаў.

Плынь замежных інвестыцый у расейскую эканоміку зменшылася на фоне падзення кошту нафты, рэцэсіі і павелічэння геапалітычных рызык, піша finanz.ru.

За ліпень-верасень нерэзідэнты ўклалі ў рэальны сектар РФ 3,1 млрд даляраў - у 3 разы менш, чым за той жа перыяд год таму, вынікае са звестак ЦБ аб аплатным балансе за трэці квартал. Назапашаным вынікам за 9 месяцаў прыток замежных грошай у бізнэс на тэрыторыі РФ стаў меншы у 5 разоў - 4,7 млрд даляраў супраць 24,2 млрд год таму.

Рэальны сектар расейскай эканомікі застаецца таксічным ў вачах замежнікаў, і гэты ж статус набываюць расейскія каштоўныя паперы.

Адток капіталу з акцый расейскіх кампаній, са звестак ЦБ, працягваецца з пачатку года практычна без прыпыненняў: за 9 месяцаў нерэзідэнты пазбавіліся ад партфельных інвестыцый на 3 млрд даляраў.

Расейская дзяржаўная завінавачанасць тым часам таксама страчвае прывабнасць як крыніца спекулятыўнага даходу на высокіх адсоткавых стаўках. Калі ў першай палове года нерэзідэнты ўклалі 1,8 млрд даляраў у аблігацыі федэральнай пазыкі, то ў трэцім квартале пачалі прадаваць (на 0,7 млрд даляраў).

Агульны адток прыватнага капіталу з Расеі за студзень-верасень паскорыўся ў 1,6 разы - да 35,5 млрд даляраў.

Замежны бізнэс значна скараціў сваю прысутнасць у Расеі ў 2014 годзе: з рэальнага сектара было эвакуяваная 180 млрд даляраў, або 38% усіх прамых інвестыцый.

Пачынаючы з 2015-га замежнікі паступова вярталіся на расейскі рынак, аднак да дасанкцыйнага ўзроўню так і не вярнуліся: на 1 красавіка 2020 года у капітал расейскіх кампаній было ўкладзена 398 млрд даляраў замежных грошай супраць 410 мільярдаў на пачатак 2014 года.

Спроба развярнуць эканоміку на ўсход у надзеі на кітайскія грошы скончылася крахам: на КНР па-ранейшаму прыпадае менш за 1% ад агульнай сумы прамых замежных інвестыцый, прычым сума скарачаецца - 2,3 млрд даляраў (на кастрычнік мінулага года) супраць 4,5 мільярда ў 2014 годзе.

Замежнікі не інвестуюць у Расею, але і сама Расея не спяшаецца інвеставаць у сябе. Зараз інвестыцыі складаюць прыкладна 23% ВУП, а для росту трэба мінімум 30%, паказвае загадчык аддзела рынкаў капіталу ІМЭМА РАН Якаў Міркін.

Па выніках другога квартала Расстат зафіксаваў падзенне інвестыцый на 11,7%, і гэта «яшчэ добры вынік», кажа галоўная эканамістка Альфа-банка Наталля Арлова: у крызіс 2008-09 гадоў падзенне перавышала 19%.

Для росту дзяржава павінна больш выдаткоўваць і менш выцягваць рэсурсаў у выглядзе падаткаў, мяркуе Міркін. Але яна абірае збіранне гіганцкіх рэзерваў на «чорны дзень», і нават калі ён наступае, адмаўляецца раскрыць «скарбонку».

«У выніку - слабая эканоміка. Яна мае патрэбу ў глыбокай тэхналагічнай мадэрнізацыі. У нас велізарныя прадуктовыя пустоты і вельмі дробная фінансавая сістэма. Мы кожны год адстаём ад свету. Сапраўдная падушка бяспекі - не дадатковыя рэзервы, а хуткі рост», - адзначае Міркін.