Навукоўцы пацвердзілі наяўнасць працяглага імунітэту пасля каранавіруса

Спецыялісты вывучылі выпрацоўку антыцелаў у крыві амаль шасці тысяч чалавек.

Навукоўцы Універсітэта Арызоны ў ЗША пацвердзілі, што імунітэт пасля перанесенай інфекцыі COVID-19 захоўваецца на працягу, як мінімум, некалькіх месяцаў. Пра гэта паведамляецца ў артыкуле Immunity (пераклад - lenta.ru).

Спецыялісты вывучылі выпрацоўку антыцелаў у крыві амаль шасці тысяч чалавек. Калі вірус упершыню атакуе клеткі, імунная сістэма мабілізуе кароткажывучыя плазматычныя клеткі, якія выпрацоўваюць антыцелы для неадкладнай барацьбы з вірусам. Праз некаторы час з'яўляюцца імунныя клеткі, якія забяспечваюць наяўнасць працяглага імунітэту.

Навукоўцы распрацавалі тэст, які дазваляе выявіць антыцелы, што звязваюцца з двума рознымі ўчасткамі S-бялка: S1 і S2. Большасць тэстаў нацэленая толькі на S1, дзе знаходзіцца рэцэптар-злучальны дамен. У гэтым выпадку вынікі тэсту былі станоўчымі, калі ў пацыентаў меліся антыцелы да кожнага ўчастку.

Папярэднія даследаванні экстрапалявалі выпрацоўку антыцелаў пры пачатковым этапе інфекцыі, праз што ўважалася, што ўзровень антыцелаў хутка зніжаецца пасля заражэння, забяспечваючы толькі кароткачасовы імунітэт. Аднак гэтыя вынікі не ўлічвалі доўгажывучыя плазматычныя клеткі, якія забяспечваюць арганізм антыцеламі, эфектыўнымі супраць каранавіруса. Навукоўцы прыйшлі да высновы, што абарона захоўваецца на працягу 5-7 месяцаў і даўжэй. Акрамя таго, тыя, хто перанёс SARS у 2003 годзе, дагэтуль маюць імунітэт да яго ўзбуджальніка.