Прэзідэнт Кыргызстана сышоў у адстаўку
36- 15.10.2020, 11:11
- 22,810
Сааранбай Жээнбекаў заявіў, што мір у краіне і жыццё суайчыннікаў для яго даражэйшыя за ўсё.
Прэзідэнт Кыргызстана Сааранбай Жээнбекаў сёння, 15 кастрычніка, падаў у адстаўку. Палітык зрабіў зварот да грамадзян у сувязі з грамадска-палітычнай сітуацыяй, якая склалася ў краіне, паведамляе ягоная прэс-служба.
Тэкст звароту падае прэс-служба прэзідэнта Кыргызстана:
«Дарагія суайчыннікі!
Грамадска-палітычная сітуацыя ў сталіцы нашай краіны - Бішкеку застаецца напружанай.
Учора Жагорку Кенеш зацвердзіў склад Урада, я падпісаў указы Прэзідэнта Кыргызскай Рэспублікі аб адпаведных прызначэннях. Але гэта не зняло напружанасць.
На жаль, агрэсія не сціхае, патрабаванне маёй неадкладнай адстаўкі працягваецца.
Бягучая сітуацыя блізкая да двухбаковага канфлікту.
З аднаго боку - пратэстоўцы, з другога - праваахоўныя органы. Вайскоўцы і праваахоўныя органы абавязаны выкарыстаць зброю для абароны Дзяржаўнай рэзідэнцыі. У гэтым выпадку пральецца кроў, гэта непазбежна. Я заклікаю абодва бакі не паддавацца правакацыям.
Дарагія мае суайчыннікі!
Для мяне мір у Кыргызстане, цэласнасць краіны, адзінства нашага народа і спакой у грамадстве вышэй за ўсё. Няма нічога даражэйшага для мяне за жыццё кожнага майго суайчынніка.
Я не трымаюся за ўладу. Не хачу застацца ў гісторыі Кыргызстана як Прэзідэнт, які праліў кроў і страляў ва ўласных грамадзян.
Таму прыняў пастанову сысці ў адстаўку.
Заклікаю Жапарава і іншых палітыкаў адвесці сваіх прыхільнікаў са сталіцы краіны і вярнуць мірнае жыццё бішкекцам.
Ніякая ўлада не варта цэласнасці нашай краіны і грамадства.
Няхай беражэ нас усіх Усявышні, хай будзе мір і спакой на нашай зямлі!»
У Кыргызстане другі тыдзень трывае палітычны крызіс, які пачаўся пасля парламенцкіх выбараў. Іх прызналі несапраўднымі праз шматлікія фальсіфікацыі. Парламент краіны 14 кастрычніка абраў новым прэм'ер-міністрам апазіцыянера Садыра Жапарава, а прэзідэнт Сааранбай Жээнбекаў зацвердзіў яго на пасадзе.
Жапараў патрабаваў адстаўкі Жээнбекава да раніцы 15 кастрычніка, аднак прэзідэнт заявіў, што сыдзе ў адстаўку толькі пасля новых парламенцкіх выбараў.
З раніцы 15 кастрычніка ў Бішкеку сабраліся прыхільнікі новаабранага прэм'ер-міністра Садыра Жапарава, яны патрабавалі неадкладнай адстаўкі прэзідэнта Сааранбая Жээнбекава.