Ансамбль «Харошкі» заклікалі не станавіцца «здраднікамі»
16- 15.10.2020, 16:36
- 79,967
Іх заклікаюць адмовіцца ад выступу на сцэне Купалаўскага тэатра.
Беларускі фонд культурнай салідарнасці заклікаў калектыў ансамбля «Харошкі» не выступаць на сцэне Купалаўскага тэатра.
Таксама ў заяве адзначаецца, што на калектыў ідзе ціск з боку ўладаў
«Дырыжор ансамбля «Харошкі» Іван Ерамеевіч падпісаўся пад адкрытым лістом дзеячаў культуры і сёння быў звольнены са сваёй пасады.
У калектыве праз адміністрацыйны ціск адбываецца раскол.
Івана прымусілі сысці праз ягоную грамадзянскую пазіцыю, астатніх схіляюць да лаяльнасці і штрэйкбрэхерства», - паведамляе фонд.
У заяве адзначаецца, што аркестр адмовіўся ад выступаў у Купалаўскім тэатры, акторы якога звольніліся на знак пратэсту.
«Канцэрты будуць праходзіць пад фанаграму, што ганебна для ансамбля, які заўсёды працаваў з жывым гукам. Прыкра, што ў праграме канцэрта запланаваны выступ дзіцячай студыі «Харошак». Некаторыя бацькі не хочуць, каб іх дзеці выходзілі на сцэну.
Калі выступ «Харошак» на сцэне Купалаўскага ўсё ж адбудзецца, гэта назаўжды застанецца бруднай плямай у гісторыі калектыву і забяспечыць яму сумны статус «здраднікаў». Яго міжнародная рэпутацыя будзе непапраўна сапсаваная.
Заклікаем удзельнікаў «Харошак» і асабіста Народную артыстку Беларусі Валянціну Гаявую адмовіцца ад гэтага выступу і такім чынам выказаць салідарнасць з купалаўцамі, звольненым дырыжорам свайго калектыву і ўсімі дзеячамі культуры, пацярпелымі праз свае перакананні.
У сваю чаргу мы гатовыя ўсебакова падтрымаць удзельнікаў «Харошак» і абараніць іх ад адміністрацыйных рэпрэсій», - гаворыцца ў заяве.