Партызанскі марш паламаў шаблон

Пратэстоўцы нікуды сыходзіць не збіраюцца.

Партызанскі марш, які прайшоў у нядзелю па Партызанскім праспекце, паказаў, што пратэсты могуць прыносіць сюрпрызы, а пратэстоўцы нікуды сыходзіць не збіраюцца, піша thinktanks.by.

Пачаўся марш пад 15.00 на Партызанскім праспекце. Пратэстоўцы дайшлі па праспекце да ўнівермага «Беларусь». Прайсці да станцыі метро «Аўтазаводская» перашкодзіў кардон амапаўцаў. Тады пратэстоўцы развярнуліся і адправіліся ў Серабранку. Пад 17.20 шэсце закончылася.

У маршы ўзялі ўдзел дзясяткі тысяч чалавек. Больш канкрэтную лічбу ніякія СМІ назваць не могуць, бо ў новых лакацыях такія масы людзей палічыць вельмі складана.

Асаблівасці Партызанскага маршу:

Упершыню акцыя прайшла па-за цэнтрам Менска, што дазволіла пратэстоўцам сабрацца ў дастатковай колькасці, што прадухіляе масавы разгон.

Каля стэлы сілавікі вывучылі ўсе подступы да месца збору і адпрацавалі варыянты блакавання і затрымання груп пратэстоўцаў. У новай лакацыі сілавікі сутыкнуліся з адсутнасцю раней падрыхтаванага плана дзеянняў.

Нягледзячы на заявы чыноўнікаў і дзяржаўных СМІ аб радыкалізацыі пратэстаў, пакуль відавочная толькі радыкалізацыя сілавікоў. На Партызанскім праспекце 18 кастрычніка зноў гучалі стрэлы. Асэнсаванасць гэтай страляніны з боку міліцыі выклікае пытанні.

Партызанскі марш прадэманстраваў, што заявы пра «сціханне» пратэсту не вытрымліваюць крытыкі. Зразумела, што кожную нядзелю па 200 тысяч удзельнікаў на акцыі выходзіць не будзе. Аднак ядро пратэстаў захоўваецца і перыядычна можа папаўняцца за кошт тых, хто не прытрымліваецца рэжыму выхаду кожную нядзелю, але салідарны з пратэстоўцамі.

У нядзелю зафіксавана памяншэнне колькасці затрыманых. Гэта адбылося не праз нечаканую гуманнасць сілавікоў, а праз злом звыклага шаблону правядзення акцый разам з хуткай канцэнтрацыяй у адным месцы яе ўдзельнікаў.