Міжнародны гросмайстар адмовіўся гуляць у чэмпіянаце Беларусі
24- 19.10.2020, 16:25
- 59,999
Уладзіслаў Кавалёў падпісаў адкрыты ліст спартоўцаў з патрабаваннямі да ўлады.
Міжнародны гросмайстар Уладзіслаў Кавалёў адмовіўся гуляць у чэмпіянаце Беларусі і падпісаў адкрыты ліст спартоўцаў з патрабаваннямі да ўлады, паведамляе tut.by са спасылкай на Свабоднае аб'яднанне спартоўцаў Беларусі.
Кавалёў - адзіны беларускі шахматыст, які ўваходзіць у першую сусветную сотню найлепшых гросмайстраў. Ён павінен быў узяць удзел у чэмпіянаце краіны і нават прысутнічаў на лёсаванні, але за некалькі гадзін да старту пастанавіў адмовіцца ад турніру.
Прычынай стала тое, што РЦАП у шахматах і шашках падрыхтаваў дадатковае пагадненне да кантрактаў спартоўцаў. Паперы раздалі на адкрыцці чэмпіянату Беларусі. У дакуменце была прапісаная забарона на публічныя выказванні без узгаднення з наймальнікам, а таксама іншыя абмежавальныя пункты. Уладзіслаў Кавалёў палічыў гэта парушэннем сваіх канстытуцыйных правоў, подпіс пад пагадненнем не паставіў і ад спаборніцтваў адмовіўся.
Разам з Кавалёвым ад удзелу ў Вышэйшай лізе адмовіліся гросмайстар Яўген Падольчанка і міжнародны майстар Віталь Мерыбанаў. Яны таксама падпісалі адкрыты ліст спартоўцаў. У спісе падпісантаў таксама Андрэй Жыгалка, Сяргей Азараў, а адной з першых ліст падпісала старшыня Беларускай федэрацыі шахматаў Анастасія Сарокіна.
Усяго гэты ліст на гэты момант падпісалі больш за 900 чалавек з беларускага спорту.