Расея рыхтавала кібератакі на Алімпіяду-2020 у Токіа

Да спробы сарваць Алімпіяду ў Паўднёвай Карэі датычныя кіберпадраздзяленні ГРУ.

Расейскія спецслужбы планавалі кібератакі на Алімпійскія гульні-2020, якія павінны былі прайсці ў Токіа гэтым летам. Пра гэта заявілі ў МЗС Вялікабрытаніі, піша The Guardian.

У Нацыянальным цэнтры кібербяспекі Вялікабрытаніі прыйшлі да высновы, што расейскія спецслужбы спрабавалі сарваць правядзенне Алімпійскіх гульняў да таго, як іх перанеслі на 2021 год праз пандэмію. Частка нападаў была нацэленая на агенцтвы, якія расследавалі ўжыванне допінгу расейскімі спартоўцамі.

«Дзеянні ГРУ, накіраваныя супраць Алімпійскіх і Паралімпійскіх гульняў, цынічныя і неразумныя. Мы асуджаем іх у самых моцных выразах. Вялікабрытанія разам са сваімі партнёрамі працягне выяўляць такія зламысныя атакі», - запэўніў міністр замежных спраў Брытаніі Дамінік Рааб.

Як паведамляе Associated Press, Міністэрства юстыцыі ЗША выставіла шасці расейцам абвінавачванне ў кібератацы ў ЗША, Францыі, Украіне і Японіі. Памочнік генпракурора ЗША ў нацыянальнай бяспецы Джон Дэмерс заявіў, што расейскія афіцэры ГРУ ўчынілі напады на амерыканскія кампаніі, энэргетычную сістэму Украіны, арганізатараў Зімовых Алімпійскіх гульняў у Паўднёвай Карэі ў 2018 годзе і ўдзельнікаў выбараў прэзідэнта ў Францыі ў 2017 годзе. Афіцэраў ГРУ ўважаюць датычнымі да распаўсюджвання віруса NotPetya у 2017 годзе.

У Вялікабрытаніі ўважаюць, што да спробы сарваць Алімпіяду ў Паўднёвай Карэі датычная кіберпадраздзяленне ГРУ, якое спрабавала выдаць сябе за паўночнакарэйскіх і кітайскіх хакераў.

Нагадаем, Расею адхілілі ад зімовай Алімпіяды 2018 за допінг. У снежні 2019 года РФ на чатыры гады пазбавілі права ўдзельнічаць у буйных міжнародных турнірах, уключаючы Алімпіяды і чэмпіянаты свету.