Еўразвяз уводзіць санкцыі супраць рэжыму Лукашэнкі
82- 2.10.2020, 7:33
- 87,496
Санкцыі пачнуць дзейнічаць сёння.
Еўразвяз з 2 кастрычніка ўвядзе санкцыі ў дачыненні да прыкладна 40 афіцыйных асоб з атачэння Лукашэнкі, адказных за фальсіфікацыю выбараў і парушэнне правоў чалавека. Пра гэта паведамляе ТАСС са спасылкай на заяву кіраўніка Еўрарады Шарля Мішэля на прэс-канферэнцыі аб выніках першага дня саміту ЕЗ у Брусэлі, які пачаўся ў чацвер і закончыўся за поўнач.
«Мы вырашылі рэалізаваць санкцыі, якія мы ўзгаднілі ў жніўні. Гэта азначае, што заўтра (у пятніцу 2 кастрычніка - рэд.) пісьмовай працэдурай будзе рэалізаваны чорны спіс з прыкладна 40 імёнаў», - сказаў ён, адзначыўшы пры гэтым, што Лукашэнка пакуль не ўваходзіць у спіс.
У сваю чаргу прэзідэнт Францыі Эмануэль Макрон падкрэсліў, што ЕЗ не ўвёў санкцыі супраць Лукашэнкі, бо гэта падарвала б патрабаванне Брусэля пачаць дыялог з апазіцыяй пры пасярэдніцтве АБСЭ і вызваліць палітвязняў.
«Гэта [санкцыі] дало б Лукашэнку законныя падставы адмовіцца ад выканання гэтых умоў», - падкрэсліў Макрон.
Кажучы аб увядзенні санкцый кіраўнік Еўрарады Шарль Мішэль указаў: «Мы намагаем, што народ Беларусі мае права вызначаць сваю будучыню. І мы таксама маем намер далей прыкладаць усе намаганні для падтрымкі такіх важных каштоўнасцяў як свабода прэсы, свабода слова і грамадзянскай супольнасці».
Старшыня Еўрапейскай камісіі Урсула фон дэр Ляен заявіла, што «тыя, хто адказны за здушэнне дэманстрацый і апазіцыі, не застануцца беспакаранымі».
На сайце Еўрарады апублікаваная рэзалюцыя аб выніках саміту 1 кастрычніка, дзе таксама выказана пазіцыя аб Беларусі:
«Еўрапейская рада асуджае непрымальны гвалт з боку беларускіх уладаў супраць мірных дэманстрантаў, а таксама запалохванне, адвольныя арышты і затрыманні пасля прэзідэнцкіх выбараў, вынікі якіх рада не прызнае.
Еўрарада цалкам падтрымлівае дэмакратычнае права беларускага народа абіраць свайго прэзідэнта шляхам новых свабодных і справядлівых выбараў без вонкавага ўмяшальніцтва. Еўрапейская Рада заклікае ўлады Беларусі пакласці канец гвалту і рэпрэсіям, вызваліць усіх затрыманых і палітычных зняволеных, паважаць свабоду СМІ і грамадзянскай супольнасці, а таксама пачаць ўсёабдымны нацыянальны дыялог. (...) Еўрапейская рада таксама заклікае Еўрапейскую камісію падрыхтаваць комплексны план эканамічнай падтрымкі дэмакратычнай Беларусі».
Нагадаем, 29 верасня аб увядзенні санкцый супраць Лукашэнкі і яшчэ сямі яго чыноўнікаў абвясцілі Вялікабрытанія і Канада.