У ЗША рыхтуюць даклад аб актывах Лукашэнкі і ягонай сям'і

Гэта стане часткай закона аб санкцыях супраць ягонага рэжыму.

Прадстаўнікі дзвюх найбуйнейшых партый ЗША ў Кангрэсе падрыхтавалі праект дакумента, які можа стаць амерыканскім адказам на сітуацыю ў Беларусі.

Законапраект прадугледжвае ўвядзенне санкцый супраць беларускіх чыноўнікаў, павелічэнне дапамогі для краіны, а таксама падрыхтоўку дакладаў аб дзеяннях Расеі і актывах Лукашэнкі. Пра гэта паведамляе афіцыйны сайт камітэта ў міжнародных справах амерыканскага парламента (пераклад - tut.by).

Як паведамляецца, новы законапраект стаў адказам на рэпрэсіі, гвалт і фальсіфікацыю выбараў у Беларусі. Шасцёра амерыканскіх кангрэсмэнаў, якія прадстаўляюць як рэспубліканцаў, так і дэмакратаў, распрацавалі праект «Акту аб дэмакратыі, правах чалавека і суверэнітэце ў Беларусі», які фактычна зноў уводзіць у дзеянне «Акт аб дэмакратыі ў Беларусі» ад 2004 года.

Законапраект дэкларуе, што ЗША не прызнаюць вынікаў прэзідэнцкіх выбараў 9 жніўня 2020 года Беларусі, а Лукашэнку - законна абраным кіраўніком дзяржавы, а таксама падтрымліваюць правядзенне новых выбараў у адпаведнасці са стандартамі АБСЕ. Таксама ў шэрагу краін заклікаюць да вызвалення ўсіх палітычных зняволеных у Беларусі, асабліва вылучаючы грамадзяніна ЗША паліттэхнолага Віталя Шклярава і Марыю Калеснікаву. У тэксце гаворыцца, што ЗША адпрэчваюць усялякае ўключэнне Беларусі ў склад «так званай «саюзнай дзяржавы», які знаходзіцца пад кантролем Расеі».

Канкрэтныя крокі, пазначаныя ў дакуменце, уключаюць накладанне санкцый на беларускіх службовых асобаў з вышэйшых эшалонаў улады і сілавых структур, а таксама далейшыя крокі для ўзмацненні санкцыйнага рэжыму, уключаючы санкцыі ў дачыненні да расейскіх грамадзян, якія ўдзельнічалі ў палітычных рэпрэсіях і ціску на незалежныя СМІ, паказана ў дакуменце. Таксама законапраект дазваляе наданне амерыканскай дапамогі для садзейнічання дэмакратыі, правоў чалавека і вяршэнства закона ў краіне. Дакумент прадугледжвае павелічэнне памеру дапамогі Беларусі і працу Агенцтва ЗША па глабальных медыя ў выглядзе праграм для Беларусі, а таксама патрабуе распрацоўкі амерыканскай стратэгіі для прасоўванні вяшчання, інтэрнэт-свабоды і доступу да інфармацыі ў Беларусі.

Згодна з законапраектам, ЗША павінны працягваць супольныя дзеянні з ЕЗ, яго краінамі-сябрамі, Вялікабрытаніяй і Канадай для падтрымкі дэмакратычных памкненняў беларусаў і стрымлівання спробаў Расеі падарваць суверэнітэт і незалежнасць Беларусі.

У выпадку прыняцця законапраекта дзяржсакратар ЗША супольна з дырэктарам Нацыянальнай выведкі павінны будуць падрыхтаваць два даклады для Кангрэсу: адзін будзе тычыцца намаганняў Расеі «для падрыву суверэнітэту і незалежнасці Беларусі»; а другі - фінансавых актываў, якія належаць Аляксандру Лукашэнку і ягонай сям'і.

Як паведамляецца, законапраект пройдзе дапрацоўку ў камітэце замежных спраў Кангрэса 2 кастрычніка, а затым будзе перададзены для далейшага разгляду поўным складам Палаты прадстаўнікоў.