У двух раёнах Менска з крана цячэ «сапсаваная» вада
10- 2.10.2020, 14:29
- 28,635
Санстанцыя папрасіла менчукоў не піць яе і не выкарыстоўваць у побытавых патрэбах.
Праблемы з вадой у некаторых частках Менска прадаўжаюцца, паведамляе афіцыйны сайт «Менскводаканала». Паводле вынікаў маніторынгу, пагоршыліся паказнікі жалеза, марганцу і мутнасці, а санэпідслужбы просіць не піць ваду з крана ў Савецкім і Першамайскім раёнах.
Чаму ў Савецкім і Першамайскім раёнах нельга піць ваду з крана?
Санітарна-эпідэміялагічная служба Менска ўзяла спробы вады ў Савецкім і Першамайскім раёнах (на вул. Мірашнічэнкі, вул. Сядых і Лагойскі тракт), сказана на сайце minsksanepid.by. У вадзе ёсць адхіленні ад патрабаванняў у паказніках мутнасці і ўтрымання жалеза.
«Санітарна-эпідэміялагічная служба рэкамендуе абмежаваць выкарыстанне вады для пітных патрэбаў да стабілізацыі сітуацыі», – сказана на сайце.
Што адбываецца з вадой?
Учора праз пашкоджанні трубаправода падчас будаўнічых працаў у раёне Зялёнага Луга можа пагоршыцца якасць вады.
– Вынікі спробаў, узятых а 9-й – 9:45, сведчаць пра пагаршэнне якасці вады ў паказніках «жалеза», «марганец», «мутнасць», – сказала агенцтву «Менск-Навіны» галоўная дзяржаўная санітарная лекарка Менска Святлана Ярмак. – Цяпер мы рыхтуем дакументы пра ўвядзенне часовай забароны выкарыстання вадаправоднай вады ў пітных мэтах у асобных частках горада.
Гэтыя праблемы тычацца жыхароў мікрараёна Зялёны Луг, а таксама тых, чые дамы знаходзяцца ў квартале вуліцаў Мірашнічэнкі, Гамарніка, Кальцова, Лагойскі тракт, Сядых, Каліноўскага, Шырокая, Лук'яновіча, Усходняя, Някрасава, Я. Коласа і Сурганава.