ЗША адмовілі Беларусі ў выдаванні статусу краіны з рынкавай эканомікай

Рэжым хацеў змяніць статус, але не змяніў эканоміку для спрашчэння імпарту металапрадукцыі.

Міністэрства гандлю ЗША наважыла захаваць статус Беларусі як краіны з нярынкавай эканомікай (non-market economy, NME) у адпаведнасці з антыдэмпінгавым законам ЗША, гаворыцца ў паведамленні амерыканскага ведамства.

У лютым рэжым Беларусі звярнуўся да ўладаў ЗША з просьбай пра змену статусу краіны.

«Пастанова міністэрства гандлю вынікае з просьбы ўрада Беларусі перагледзець свой статус нярынкавай эканомікі. У выніку сённяшняй пастановы Міністэрства гандлю працягне разглядаць Беларусь як краіну з нярынкавай эканомікай для мэт разліку дэмпінгавых нацэнак ў антыдэмпінгавых справах», - гаворыцца ў паведамленні Мінгандлю ЗША ў аўторак.

Мінгандлю ЗША ўдакладніў, што ўрад Беларусі папрасіў пра змену статусу для спрашчэння імпарту металапрадукцыі з гэтай краіны.

Беларускія ўлады ініцыявалі перагляд статусу рэспублікі Мінгандлем ЗША на фоне паляпшэння двухбаковых стасункаў пасля амаль 10-гадовага перыяду ахалоджвання пасля прэзідэнцкіх выбараў 2010 года. Аднак пасля прэзідэнцкіх выбараў у жніўні 2020 года, вынікі якіх Вашынгтон не прызнаў, стасункі зноў пагоршыліся. У пачатку кастрычніка ЗША ўвялі персанальныя санкцыі ў дачыненні да васьмі беларускіх чыноўнікаў, якіх лічаць адказнымі «за фальсіфікацыю выбараў і парушэнне правоў чалавека».

23 верасня беларускі дыктатар на цырымоніі «інаўгурацыі» прыняў прысягу «прэзідэнта» Беларусі, якім ён сам сябе абвясціў з дапамогай падкантрольнай Цэнтральнай выбарчай камісіі.