У Расеі памёр скандальны протаіерэй Дзмітрый Смірноў
- 21.10.2020, 10:14
- 29,264
Святар быў вядомы сваімі рэзананснымі выказваннямі.
Памёр расейскі протаіерэй, кіраўнік патрыяршай камісіі ў справах сям'і Дзмітрый Смірноў. Пра гэта паведаміў прэс-сакратар Сінадальнага аддзела па царкоўнай дабрачыннасці і сацыяльнага служэння Васіль Рулінскі.
«Цяпер стала вядома пра смерць святара Дзімітрыя Смірнова. Царства нябеснае дарагому святару. Уладыка Панцеляймон (Шатаў) (старшыня Сінадальнага аддзела. - рэд.) у Паўднёва-Сахалінску правёў паніхіду па памерлым святару Дзімітрыю», - напісаў ён.
Святару было 69 гадоў. Прычына смерці не называецца. Вядома, што ў траўні яго шпіталізавалі праз каранавірус.
Дзмітрый Смірноў вядомы сваімі рэзананснымі выказваннямі. Так святар заяўляў, што лічыць эпідэмію каранавіруса «надзвычай карыснай з'явай», бо дзякуючы ёй «эгаізм стаў змяншацца» і актывізавалася валанцёрства. Жанчын, якія жывуць у безрэгістрацыі, ён назваў «бясплатнымі прастытуткамі». Смірноў таксама казаў, што школьная адукацыя дзяўчаткам не вельмі патрэбна - важней яе навучыць даглядаць дзяцей, «так яна будзе ўжо гатовая мама, усё будзе ўмець».