У Полацку звольніўся ідэолаг райвыканкама
14- 23.10.2020, 16:08
- 28,246
Ідэалагічная «вертыкаль» Лукашэнкі трашчыць па швах.
У Полацкім райвыканкаме звольніўся начальнік аддзела ідэалагічнай работы і спраў моладзі Дзяніс Гуткін.
Партал tut.by звязаўся з Дзянісам Гуткіным, каб даведацца прычыну звальнення. Ён не стаў гэта каментаваць, але пацвердзіў, што сышоў з пасады.
Дзяніс Гуткін не працуе ў райвыканкаме з 23 кастрычніка. На сайце мясцовай адміністрацыі яшчэ можна знайсці ягоныя звесткі.
Намесніца начальніка аддзела ідэалагічнай работы і спраў моладзі Вольга Сапун выконвацьме абавязкі кіраўніка, паведамілі парталу gorod214.by ў райвыканкаме.
Нагадаем, у Глыбокім 21 жніўня звольнілася з працы намесніца начальніка аддзела ідэалагічнай працы, культуры і спраў моладзі райвыканкама - 28-гадовая Марына Сакалоўская.
Дзяўчына распавяла, што падала заяву 10 жніўня, на наступны дзень пасля выбараў. Звальненне звязанае з палітычнай сітуацый у краіне:
- Пазіцыя многіх людзей такая, што яны супраць дзейнай улады, не згодныя з вынікамі выбараў. Я хачу быць сумленнай перад сваімі землякамі ды іншымі беларусамі. Таму і сышла з райвыканкама. Сышла на загад сумлення.