У Менску наспявае новы горадабудаўнічы скандал

Сотні жыхароў раёна ўзбунтаваліся.

Пакуль у Ждановічах змагаюцца за захаванне парку, у Менску наспявае новы горадабудаўнічы скандал. Участак у раёне вуліц Адзінцова і Якубоўскага - даўно прадмет спрэчкі мясцовых жыхароў і чыноўнікаў, а ў сярэдзіне кастрычніка людзям паведамілі - тут хочуць пабудаваць шматкватэрны дом, піша realt.by.

22 кастрычніка мясцовыя сабраліся, каб выказацца «супраць» будоўлі, але, як аказалася, абмеркаванне скасавалі. Дыялогу не атрымалася, але жыхары наважылі дзейнічаць.

Што хочуць пабудаваць

Участак у раёне вуліц Адзінцова і Якубоўскага знаходзіцца ва ўнікальным менскім квартале, дзе жывуць людзі з парушэннем або адсутнасцю гледжання, а вакол дамоў створаная спецыяльная інфраструктура, каб іх жыццё было прасцейшым. Сёння спрэчная пляцоўка выглядае так.

Са слоў мясцовых жыхароў, у 2009 годзе людзі прасілі прэзідэнта пабудаваць тут дом або інтэрнат для супрацоўнікаў УП Святлопрыбор ТАА «БелТІЗ» - адзінага прадпрыемства ў Менску, дзе працуюць людзі з дрэнным зрокам. Але безвынікова - у красавіку 2016 года прэзідэнцкім указам участак адышоў «Заводу эфектыўных прамысловых канструкцый». Першапачаткова забудоўшчык хацеў узвесці тут 16-павярхоўку, але жыхары выступілі «супраць», а РУП «Галоўдзяржбудэкспэртыза» выдала адмоўнае заключэнне дзяржаўнай экспэртызы.

Канцэпцыю перагледзелі, і цяпер у лесапарку «Мядзвежына» прапануецца пабудаваць двухсекцыйны дом зменнай паверхавасці (4, 6, 8 паверхаў) на 81 кватэру: 41 аднапакаёвая, 14 двухпакаёвых і 26 трохпакаёвых. Праект таксама прадугледжвае плоскасную аўтастаянку на 98 машынамесцаў. Плошча забудовы - 1 244,20 м.кв., плошча жылога будынка - 6 114,89 м.кв. Заказчык праекта - камунальнае ўнітарнае прадпрыемства «Завод эфектыўных прамысловых канструкцый», распрацоўшчык праекта - УП «Белбудцэнтр».

Што думаюць мясцовыя жыхары

Аднак мясцовыя супраць і 16-павярховага, і 8-павярховага дома. Сярод асноўных прэтэнзій да праекту - парушэнне межаў існай забудовы, якая абслугоўваецца. Мясцовыя не разумеюць, на якой падставе ў праект уключаны межы існай паркоўкі і абсталяванай дзіцячай пляцоўкі, якія знаходзяцца ў зоне абслугоўвання горада. Са слоў тых, хто сабраўся, парковачных месцаў у раёне ўжо недастаткова.

- На падставе чаго будуць разбураныя існыя элементы інфраструктуры квартала, якія выкананы згодна з праектам забудовы? - не разумеюць людзі.

Акрамя пытанняў, ёсць і прапановы. Замест новага будаўніцтва людзі прапануюць за свой кошт акультурыць тэрыторыю спартыўнымі аб'ектамі і зонамі адпачынку, а рашэнне аб выдзяленні ўчастка прызнаць памылковым:

- Просім прызнаць памылковым вылучэнне гэтага зямельнага ўчастка пад ўшчыльненне забудовы і прапанаваць забудоўшчыку альтэрнатыўны зямельны ўчастак пад забудову. Звяртаем увагу, што гэты зямельны ўчастак выдзелены падчас кіраўніцтва галоўнага архітэктара Менска Паўла Лучыновіча (уступіў у пасаду ў лютым 2015 года), вядомага праз карупцыйныя справы з зямельнымі ўчасткамі і які адбываў пакаранне за такія злачынствы, - напісалі актывісты ў адміністрацыю.

Ці будзе паўторна прызначанае грамадскае абмеркаванне - пакуль невядома. Ні інфармацыі аб пераносе, ні прычыны скасавання на сайце адміністрацыі Фрунзенскага раёна не пазначаныя. У ДУА «Цэнтр тэхнічнай і мастацкай творчасці дзяцей і моладзі Фрунзенскага раёна г. Менска «Зорка», дзе павінна была адбыцца прэзентацыя, уважаюць, што мерапрыемства скасавалі праз неспрыяльнае эпідэміялагічнае становішча ў краіне. Дарэчы, гэта другое за месяц скасаванае грамадскае абмеркаванне ў Фрунзенскім раёне.

Жыхары сабралі больш за 400 подпісаў супраць ушчыльнення.