Ля штаб-кватэры МАК прайшоў пікет у падтрымку беларускіх спартоўцаў
- 24.10.2020, 18:49
- 10,677
Падтрымалі акцыю дэпутаты швейцарскага парламента, прадстаўнікі прафзвязаў, навукоўцы і студэнты.
Прадстаўнікі Беларуска-швейцарскай асацыяцыі Razam.ch правялі ў Лазане пікет і мітынг у падтрымку рэпрэсаваных беларускіх спартоўцаў ля штаб-кватэры Міжнароднага алімпійскага камітэта, паведамляе tut.by.
Падтрымку акцыі выказалі дэпутаты швейцарскага парламента, прадстаўнікі прафзвязаў, навукоўцы і студэнты.
Мітынгоўцы неслі плакаты з партрэтамі Алены Леўчанкі, Паўла Сіценкава, Мікалая Казекі, Святланы Кудзеліч і іншых пацярпелых спартоўцаў і трэнераў.
Пасля заканчэння мерапрыемства актывісты беларускай дыяспары на запрашэнне прадстаўнікоў МАК правялі перамовы з чыноўнікамі, абмеркаваўшы сітуацыю ў Беларусі і факты ціску на спартоўцаў. Актывісты перадалі МАК адкрыты ліст ад Беларускага фонду спартыўнай салідарнасці, які першай падпісала трохразовая прызёрка Алімпійскіх гульняў Аляксандра Герасіменя, у якім распавядаецца пра ціск на спартоўцаў у Беларусі.
Актывісты і прадстаўнікі Беларускага фонду спартыўнай салідарнасці заклікалі МАК:
- паскорыць расследаванне фактаў дыскрымінацыі і гвалту ў дачыненні да беларускіх спартоўцаў;
- прыпыніць дзейнасць Нацыянальнага алімпійскага камітэта Беларусі і любое фінансаванне датуль, пакуль не спыняцца парушэнні Алімпійскай хартыі і палітычны ціск на спартоўцаў;
- аказаць дапамогу тым беларускім спартоўцаў, якім з палітычных прычын было адмоўлена ў магчымасці трэніравацца ў Беларусі ці якія былі несправядліва адхіленыя ад спартыўных мерапрыемстваў або выгнаныя з краіны;
- перанесці ўсе спартыўныя мерапрыемствы з Беларусі ў сувязі з тым, што ў краіне склалася атмасфера адкрытага гвалту ў дачыненні да спартоўцаў, што прама супярэчыць духу свабоды і сумленнага спаборніцтва.