Арменія: У баявых дзеяннях у Нагорным Карабаху ўдзельнічаў турэцкі спецназ

Ерэван сцвярджае, што гатовы паказаць пераканальныя доказы.

Генпракуратура Арменія атрымала доказы ўдзелу турэцкіх вайскоўцаў ва ўзброеным канфлікце ў Нагорным Карабаху. Пра гэта ў нядзелю паведаміла прэс-служба ўстановы, паведамляе РБК.

Як гаворыцца ў паведамленні, Генпракуратура займалася папярэднім расследаваннем крымінальнай справы, распачатай паводле факту развязвання Азербайджанам вайны ў Нагорным Карабаху.

«Была атрыманая фактычная інфармацыя, што з пачатку жніўня гэтага года ўзброеныя сілы Турцыі праводзілі масавыя баявыя вучэнні з вайскоўцамі Азербайджана», – заявілі ў Генпракуратуры.

Трэніроўкі вайскоўцаў былі накіраваныя на атрыманне навыкаў вайны ў горных умовах. Як паведамляе прэс-служба, у ходзе вучэнняў «вайскоўцы УС Турцыі заявілі, што ў найбліжэйшы час варта нанесці ўдар па ваенных пазіцыях Арцаха».

Пасля гэтага, як сцвярджаюць у Ерэване, вайскоўцы турэцкага спецназу непасрэдна ўдзельнічалі ў баявых дзеяннях у рэгіёне.

З самага пачатку ўзброенага канфлікту ў Нагорным Карабаху ў канцы верасня Арменія вінаваціла Турцыю ва ўдзеле ў баях на баку Азербайджана, а таксама ў пастаўках узбраенняў і ваенных спецыялістаў. У Баку і Анкары гэтыя сцвярджэнні аспрэчваюць.

Прэм'ер-міністр Арменіі Нікол Пашынян заяўляў, што менавіта Анкара схіліла Баку да пачатку баявых дзеянняў. Газета The Wall Street Journal у кастрычніку пісала, што ў спрэчны рэгіён былі перакінутыя сотні сірыйскіх наймітаў, звязаных з Турцыяй. За ўдзел у вайне яны атрымліваюць $ 2 тыс. за месяц.

Разам з тым віцэ-прэзідэнт Турцыі Фуат Актай заяўляў, што Анкара «без прамаруджання» адправіць сваіх салдатаў і вайсковую тэхніку ў Нагорны Карабах, калі паступіць адпаведная просьба пра дапамогу з боку Азербайджана.

Кіраўнік расейскай Службы знешняй выведкі Сяргей Нарышкін гаварыў, што чарговае абвастрэнне сітуацыі ў Карабаху ўскладняецца прынцыпова новым чыннікам – адкрытым выступам Турцыі на баку Азербайджана.