5 снежня 2020, Субота, 0:12
Сім сім, Хартыя 97!
Рубрыкі

Акторы менскага Новага драматычнага тэатра абвясцілі страйк

2
Акторы менскага Новага драматычнага тэатра абвясцілі страйк
Выява TUT.BY пададзеная акторамі тэатра

Акторы адмовіліся выходзіць на сцэну.

12 актораў сталічнага Новага драматычнага тэатра абвясцілі пра страйк. З іх слоў, яны прапанавалі кіраўніцтву ў якасці альтэрнатывы адправіць тэатр на карантын, але не сустрэлі разумення, паведамляе tut.by.

Перадгісторыю гэтай сітуацыі трупа апісвае так:

— Яшчэ напрыканцы жніўня мы заклікалі кіраўніцтва абмеркаваць падзеі ў краіне. Нам адказалі, што тэатр па-за палітыкай і ўмешвацца у сітуацыю не збіраецца. Рэпертуар мы не змяняем, і забаўляльныя спектаклі працягваем ставіць як ставілі. У канцы верасня быў яшчэ адзін сход, дзе нам ясна патлумачылі, што кожны, каму не падабаецца, вольны сысці ў любы момант: «Ніхто нікога не трымае».

Сёння, 27 кастрычніка, у тэатры прайшоў сход.

- Мы напісалі ліст і перадалі яго дырэктару тэатра Васілю Марцецкаму. У лісце змяшчалася інфармацыя, што мы далучаемся да агульнанацыянальнага страйка, - кажа актор Андрэй Бібікаў.

Як кажа Андрэй, ліст падпісалі 12 чалавек (усяго ў трупе больш за два дзясяткі чалавек).

- Магчыма, іх колькасць павялічыцца. У нас ёсць хворыя, у некаторых актораў хворыя родныя.

Са слоў Бібікава, дырэктар тэатра прыйшоў на сход.

- Марцецкі любіць паўтараць, што ён - пенсіянер, у яго расейскае грамадзянства. Маўляў, я паеду, а вас [тэатр] зачыняць. Мы пастаянна спрабуем патлумачыць, што ў нас няма жадання развальваць і зачыняць тэатр. Гэта ж наш акторскі хлеб. Мы заўсёды спрабавалі знайсці кампраміс. Прапанавалі яго і ў гэтай сітуацыі: давайце пойдзем на карантын.

Як кажа Андрэй, трупа тэатра напісала пра гэта другі ліст. На яго думку, усе падставы для карантыну ёсць: у трупе ёсць хворыя.

Як сцвярджае Бібікаў, ён і яго калегі непакояцца пра эпідэміялагічны стан тэатра.

- Калі была першая хваля, казалі, што мы павінны зарабляць грошы. Зараз - таксама. Але ніякія нормы дыстанцыі не выконваюцца, рэпетыцыі як былі, так і адбываюцца.

Таксама акторы незадаволеныя і іншымі праблемамі.

- Ужо больш за паўгода на спектаклі прыходзіць мала гледачоў, на некаторыя спектаклі - па 10-15 чалавек. Пра нашы пастаноўкі няма ніякай рэкламы. Мы стаміліся з гэтым спрачацца.

Акторы, якія падпісалі ліст, адмовіліся выйсці на сцэну ў спектаклі «Бонусны сеанс псіхааналізу», які павінен быў адбыцца сёння, 27 кастрычніка.

- Мы не выйдзем на сцэну і заўтра, і паслязаўтра. Цяпер мы ў падвешаным стане. Нам нічога не сказалі. Ці звольняць нас, невядома. Але, на жаль, усё да гэтага ідзе.

Атрымаць каментар ад самога Васіля Марцецкага tut.by не змог. А 16:30 нам паведамілі ў касе тэатра, што дырэктара ўжо няма на працоўным месцы (іншыя тэлефоны адсутнічаюць на сайце тэатра). На званок на мабільны тэлефон ён не адказаў. Партал гатовы даць Васілю Марцецкаму магчымасць выказаць сваю пазіцыю ў гэтым канфлікце.

Паводле неафіцыйнай інфармацыі, вечарам дырэкцыя тэатра ўсё ж пагадзілася на ўвядзенне карантыну. Але пацверджання гэтай інфармацыі ў нас няма.

Новы драматычны тэатр Менска вядзе сваю гісторыю ад тэатра-студыі «Дзе-Я?», які ўзнік у 1987 годзе. У той час у Менску назіраўся актыўны ўздым студыйнага руху, існавала блізу 20 тэатраў-студый - невялікіх творчых калектываў, не залежных ад дзяржавы і якія дзейнічалі паводле прынцыпа самаакупнасці.

З розных прычын (у асноўным - з фінансавых) усе яны спынілі сваё існаванне ў 1990-я гады. Захаваўся толькі тэатр «Дзе-Я», які не толькі выжыў у цяжкія гады, але і набыў статус дзяржаўнага гарадскога тэатра Менска ў 1992 годзе.

Гэта адзіны дзяржаўны калектыў, які працуе не ў цэнтры Менска, а ў адным з раёнаў - на вуліцы Лізы Чайкінай недалёка ад метро «Аўтазаводская».

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».