У Венецыі сістэма шлюзаў упершыню паспяхова абараніла горад ад паводкі
- 3.10.2020, 17:43
- 23,135
Сістэма з 78 яскрава-жоўтых бар'ераў паднялася з марскога дна, калі пачаўся прыліў.
У Венецыі ў суботу сістэма ахоўных бар'ераў Mose ўпершыню паспяхова абараніла горад ад паводкі ў выніку прыліву.
Пра гэта паведамляе «Еўрапейская праўда» са спасылкай на Reuters.
Сістэма з 78 яскрава-жоўтых бар'ераў на ўваходзе ў венецыянскую лагуну паднялася з марскога дна, калі пачаўся прыліў, выкліканы моцнымі вятрамі і дажджом.
Гарадская ўлада прагназавала, што прыліў дасягне 130 см - значна ніжэй за разбуральны 187-сантыметровы прыліў, што заліў Венецыю ў лістападзе мінулага года.
Аднак калі чаканы пік наступіў неўзабаве пасля поўдня, знакамітая плошча Сан-Марка, адно з першых месцаў у Венецыі, якое пакутуе ад паводкі, заставалася ў асноўным сухім.
Сістэма абароны ад паводак коштам некалькі мільярдаў еўраў, вядомая як Mose, павінна была быць уведзеная ў эксплуатацыю ў 2011 годзе, але праект затармазілі карупцыя і марнаванне сродкаў.
У ліпені праект прайшоў выпрабаванні, і інжынеры прызналі, што ён гатовы да выкарыстання ў дрэннае надвор'е.