Інжынер-праграміст МАЗа далучыўся да стачкі

Гэта першы работнік прадпрыемства, які публічна абвясціў, што далучаецца да нацыянальнага страйку.

Уладзіслаў Тыльковіч, інжынер-праграміст прадпрыемствы МАЗ, далучыўся да агульнанацыянальнага страйку, паведамляе тэлеграм-канал «Рэальная Беларусь».

«Паглядзеў на азотаўцаў у стачцы, у аўторак стала вядома, што страйкуе БДУІР і 38 выкладчыкаў, а Лукашэнка сказаў, што будзе ўсіх страйкоўцаў звальняць. Надакучыла гэта беззаконне.

І я адважыўся выказаць салідарнасць. У сераду, 28 кастрычніка, не прыступіў да працы. Невыносна працавпаць, калі тры месяцы адбываецца гвалт, і ніхто яго не спыняе. Як потым глядзець у вочы сябрам і калегам?

Пакуль ніхто не палохаў. Проста чатыры разы прасілі, каб на пагадненне бакоў сышоў, а я адмовіўся. Ну, казалі, навошта табе артыкул у працоўнай. Ніхто не палохаў! Пішу кожны дзень тлумачальную, чаму працаваць не буду».

Гэта першы работнік МАЗа, які публічна абвясціў, што далучаецца да нацыянальнага страйку. У яго тлумачальных тры патрабаванні, трэцяе сфармуляванае проста: «Хачу, каб былі сумленныя справядлівыя выбары».