У Польшчы ўводзяць масачны рэжым
1- 8.10.2020, 20:33
- 20,220
З 10 кастрычніка ў Польшчы трэба будзе насіць ахоўныя маскі ва ўсіх грамадскіх месцах.
Урад Польшчы ў сувязі з рэзкім ростам колькасці хворых на COVID-19 уводзіць у краіне масачны рэжым для ўсіх грамадскіх месцаў. Пра гэта заявіў прэм'ер-міністр Польшчы Матэвуш Маравецкі, паведамляе Wiadomosci.
Масачны рэжым уводзіцца з 10 кастрычніка.
Прычынай гэтай пастановы з'яўляецца рэзкае павелічэнне колькасці заражэнняў каранавіруса ў краіне. За апошнія дні ў Польшчы пацвердзілі 4280 заражэнняў - гэта новы рэкорд.
«Да нас прыйшла другая хваля і мы павінны рашуча ёй супрацьстаяць», - сказаў Маравецкі, дадаўшы, што па ўсёй краіне будуць дзейнічаць правілы жоўтай зоны.
Прэм'ер Польшчы настойліва рэкамендаваў пажылым людзям не пакідаць дамы.
Маравецкі запэўніў, што сітуацыя з пункту гледжання наяўнасці колькасці ложкаў для пацыентаў бяспечная.
«У найбліжэйшыя дні колькасць наяўных ложкаў павялічыцца на некалькі тысяч», - сказаў ён.
Паводле звестак Універсітэта Джонса Хопкінса, у Польшчы афіцыйна пацверджана 111 599 выпадкаў заражэння каранавірусам, памерлі 2867 чалавек 76 400 пацыентаў паправіліся.