Захад рыхтуе эканамічны ўдар па Лукашэнку

Да чаго прывядуць новыя санкцыі?

Еўразвяз і ЗША маюць намер увесці новыя санкцыі супраць рэжыму Лукашэнкі. Пад абмежавальныя меры акрамя чыноўнікаў могуць патрапіць беларускія бізнэсоўцы і кампаніі, пішуць naviny.media.

Захад гатовы да адчувальных мераў

На Захадзе маюць намер увесці эканамічныя санкцыі супраць рэжыму Аляксандра Лукашэнкі.

На днях амерыканская Палата прадстаўнікоў ухваліла "Акт аб дэмакратыі, правах чалавека і суверэнітэце Беларусі». Дакумент пашырае паўнамоцтвы прэзідэнта ЗША да ўвядзення новых санкцыяў у дачыненні да Беларусі ў сувязі «са спрэчнымі прэзідэнцкімі выбарамі ў Беларусі 2020 года і наступнымі рэпрэсіямі з боку ўрада».

У санкцыйны спіс ЗША ўжо ўключана восем чыноўнікаў - прадстаўнікі Цэнтрвыбаркама і МУС.

«Прэзідэнт можа накласці візавыя санкцыі ў дачыненні да любога замежніка, які з'яўляецца сябрам Цэнтрвыбаркама Беларусі ці ўдзельнічаў у маніпуляцыях на прэзідэнцкіх выбарах 9 жніўня 2020 года, з'яўляецца дзяржаўнай службовай асобай, адказным за рэпрэсіі супраць незалежных СМІ, з'яўляецца службовай асобай Саюзнай дзяржавы ці з'яўляецца расейскай фізічнай асобай , якое актыўна ўдзельнічала ў рэпрэсіях супраць прэсы або парушэннях правоў чалавека, звязаных з палітычнымі рэпрэсіямі ў Беларусі», - гаворыцца ў тлумачэнні да законапраекта.

Каб законапраект ўступіў у дзеянне, яго павінен ухваліць Сенат і падпісаць прэзідэнт ЗША.

Не пазней чым праз 90 дзён пасля ўступлення дакумента ў дзеянне міністр фінансаў пасля кансультацыі з дзяржаўным сакратаром і дырэктарам Нацыянальнай разведкі павінен падрыхтаваць справаздачу аб актывах, якія знаходзяцца пад прамым або ўскосным кантролем Аляксандра Лукашэнкі.

Не пазней чым праз 120 дзён амерыканскія службоўцы дакладуць Кангрэсу пра пагрозу, якую ўрад Расеі ўяўляе для суверэнітэту і незалежнасці Беларусі.

Тым часам у Еўразвязе заявілі пра падрыхтоўку трэцяга пакета санкцый у дачыненні да афіцыйнага Менска ў адказ на працяг рэпрэсій супраць мірных грамадзян.

Зараз у санкцыйным спісе ЕЗ знаходзіцца 59 фізічных асоб, якія, на думку Брусэля, датычныя да фальсіфікацыі вынікаў прэзідэнцкіх выбараў і да гвалту ў дачыненні да пратэстоўцаў.

Абмежавальныя меры ўключаюць забарону на ўезд на тэрыторыю ЕЗ і замарожванне актываў гэтых асоб. Акрамя таго, грамадзянам і кампаніям ЕЗ забаронена даваць сродкі асобам, уключаным у санкцыйны спіс.

Сярод іх - Аляксандр Лукашэнка, сябры Цэнтрвыбаркама, высокапастаўленыя прадстаўнікі сілавога блока і іншыя чыноўнікі.

«Калі-небудзь мы вычарпаем спіс людзей, у дачыненні да якіх мае сэнс уводзіць санкцыі. Цяпер мы павінны перайсці да больш адчувальных захадаў - санкцый у дачыненні да кампаній», - растлумачыў вярхоўны прадстаўнік ЕЗ па знешняй палітыцы і палітыцы бяспекі Жазеп Барэль.

З яго слоў, новыя санкцыі паўплываюць на магчымасць прадпрыемстваў весці нармальную эканамічную дзейнасць.

Калі санкцыі ўвойдуць у дзеянне, дакладна невядома. Гэта можа быць і канец лістапада, і сярэдзіна снежня. Жазеп Барэль паабяцаў, што яго супрацоўнікі аператыўна апрацуюць прапановы, якія зыходзяць ад сябраў ЕЗ. Якія менавіта захады і супраць якіх бізнэсаў будуць уведзены, пакуль таксама невядома.

Якія санкцыі могуць увесці заходнія краіны?

У арсенале ЕЗ і ЗША ёсць шырокі набор эканамічных санкцый.

Абмежавальныя санкцыі накіраваныя на забарону пэўных дзеянняў. Напрыклад, забарона на фінансавыя аперацыі або экспарт (імпарт) маёмасці на тэрыторыю краін, якія ўводзяць санкцыі.

Сектаральныя санкцыі ўводзяцца ў дачыненні да пэўнай галіны эканомікі: энэргетыкі, транспарту, сферы высокіх тэхналогій і іншых. Яны забараняюць ўнутранаму бізнэсу краін весці бізнэс з падсанкцыйнымі кампаніямі.

Пад другасныя санкцыі могуць трапіць не толькі дзяржаўныя кампаніі і службовыя асобы, але і бізнэсоўцы і прыватныя кампаніі, якія з імі звязаныя.

Агулам эканамічныя санкцыі могуць уключаць у сябе гандлёвае эмбарга, забарону на перамяшчэнне, абмежаванне (прыпыненне) аперацый па рахунках, поўная або частковая забарона гандлю і вядзення бізнэсу, абмежаванне экспарту-імпарту ўсіх або пэўных тавараў або паслуг.

Пры накладанні санкцый краіны могуць прымяняць комплексны падыход. Напрыклад, увесці санкцыі супраць кампаній у пэўным сектары эканомікі і супраць канкрэтных асоб, якія звязаны з палітычным рэжымам.

Для прыватнага бізнэсу найбольшую небяспеку могуць прадстаўляць другасныя санкцыі. Яны маюць значны арсенал уздзеяння і цягнуць эканамічныя наступствы. Да прыкладу, у выпадку поўнай забароны на вядзенне бізнэсу будзе немагчыма ажыццявіць адгрузку або прыёмку тавару. Іншымі словамі, бізнэс кампаній можа быць фактычна паралізаваны, а рынак збыту закрыты.

Акрамя таго, нават калі агульнае ўжыванне санкцый было анансаванае, для канкрэтнай асобы гэта ўсё роўна будзе раптоўна. Падставы для ўвядзення санкцый могуць яму i не называцца, таму працэс абскарджвання можа доўжыцца гадамі.