Нямецкі аналітык: Будучыня Беларусі пачынаецца з аднаго слова: «Сыходзь!»

Франк Хофэр - пра тое, якая праграма дапамогі патрэбная нашай краіне.

Навуковы супрацоўнік Глабальнага ўніверсітэта працы Франк Хофэр - пра тое, якая праграма дапамогі патрэбная нашай краіне.

- Беларусы маюць патрэбу ў маральнай, палітычнай і фінансавай падтрымцы і практычнай дапамозе арыштаваным, перамешчаным асобам і тым, каго пераследуюць, - піша Франк Хофэр. - Не толькі сярод міжнародных прыхільнікаў, але і ў рамках самога пратэстнага руху назіраецца шырокі спектр палітычных настрояў і эканамічных інтарэсаў.

Па-іншаму і не можа быць пры такім шырокім пратэстным руху, і калі будзе дасягнутая мэта, якая аб'ядноўвае - Лукашэнка сыдзе і адбудуцца свабодныя выбары - гэтыя адрозненні стануць відавочнымі.

«Лукашэнка, сыходзь» - патрабуюць людзі па ўсёй Беларусі ўжо многія тыдні запар. Гэтая барацьба за свабоду народа, які патрапіў у пастку паміж геапалітычнымі інтарэсамі, мае патрэбу і заслугоўвае нашай поўнай салідарнасці.

Салідарнасць цяпер азначае падтрымку пратэстнага руху, бастуючых працоўных і іх незалежных прафзвязаў, журналістаў і іншых ініцыятыў грамадзянскай супольнасці. Але гэта таксама і прапанова еўрапейскай эканамічнай падтрымкі дэмакратычнай Беларусі.

Менавіта падтрымкі, а не таго, што ўважаюць за правільнае тэхнакраты з МВФ, ЕЦБ і Еўракамісіі і навязваюць краінам. Гаворка павінна ісці аб падтрымцы справядлівага і інклюзіўнага працэсу рэформаў супольна з дэмакратычнымі прадстаўнікамі беларускага народа і пры шырокім удзеле насельніцтва.

Пытанне ў тым, каб пазбегнуць сацыяльных памылак, дапушчаных падчас мінулых пераўтварэнняў, калі за палітычным вызваленнем для многіх рабочых, фермераў і пенсіянераў рушыла ўслед эканамічная роспач.

Замест фатальных праграм структурных рэформаў мінулага дэмакратычныя сілы Беларусі маюць патрэбу ў эканамічнай прасторы для сацыяльна адказных і справядлівых пераўтварэнняў.

Безумоўнае адкрыццё ўнутранага рынку ЕЗ для экспарту з Беларусі, выдача прамежкавых крэдытаў для прадухілення кароткатэрміновага фінансавага крызісу, стымуляванне наўпроставых еўрапейскіх інвестыцый і шырокае супрацоўніцтва ў галіне навукі і адукацыі - былі б іх важнымі складнікамі.

Тое ж самае тычыцца кансультавання і садзейнічання ў стварэнні дзяржаўных банкаў развіцця, уключэння работнікаў і незалежных прафзвязаў у структуры карпаратыўнага кіравання, адказнага кіравання камунальнымі службамі, а таксама распрацоўкі сістэм усеагульнага пенсійнага забеспячэння і аховы здароўя.

Адным словам, такая праграма дапамогі, якая спрыяе пашырэнню магчымасцяў для развіцця краіны, а не накіраваная, у першую чаргу на перыферыйную інтэграцыю ў эканамічныя і міграцыйныя інтарэсы еўрапейскіх цэнтраў улады.

Пытанні аб шляхах будучых пераўтварэнняў павінны ставіцца і абмяркоўвацца ўжо цяпер, нават калі адказаць на іх можна будзе толькі пасля перамогі над Лукашэнкам і самавызваленнем беларускага народа. Таму што там, дзе адсутнічаюць пазітыўныя ідэі для трансфармацыі - рынак, улада і грошы запоўняць існы вакуум. Аднак нават калі сёння няма яснасці ў дачыненні да будучыні Беларусі, відавочна, што яна пачынаецца з аднаго слова: «Сыходзь!» - рэзюмуе экспэрт.