Кіраўнік МЗС Вялікабрытаніі запатрабаваў ад беларускіх уладаў вызваліць журналістаў
5- 25.11.2020, 8:08
- 15,901
З іх павінны быць знятыя ўсе абвінавачанні.
Міністр замежных спраў Вялікабрытаніі Дамінік Рааб заклікаў улады Беларусі вызваліць затрыманых журналістаў. Пра гэта палітык напісаў у Twitter.
Кіраўнік МЗС заклікаў таксама зняць з журналістаў усе абвінавачанні. Ён адзначыў, што рэпарцёраў садзяць у турму, каб прымусіць іх замаўчаць і перашкодзіць распаўсюджванню інфармацыі аб парушэнні правоў і свабод беларускага народа.
I call for the immediate release of all journalists arbitrarily imprisoned in #Belarus, & for charges against them to be dropped. This is a cowardly attempt by Lukashenko’s regime to silence dissent & stop the reporting of #humanrights violations against the Belarusian people.
— Dominic Raab (@DominicRaab) November 24, 2020
Сёння ў Беларусі за кратамі паводле адміністрацыйных або крымінальных спраў знаходзяцца 12 журналістаў: гэта журналістка tut.by Кацярына Барысевіч, журналістка tut.by і «Новы Час» Аляксандра Квіткевіч, журналісткі «Белсата» Кацярына Андрэева і Дар'я Чульцова, журналісты БелаПАН Максім Лаўрэцкі, Юлія Котская, Андрэй Шаўлюга, Андрэй Рабчык, журналісты Алег Грузьдзіловіч, Ігар Карней, Марына Кастылянчэнка і Кацярына Мядзведзева.
Паводле падлікаў Беларускай асацыяцыі журналістаў, за час выбараў і поствыбарчы перыяд ахвярамі пераследу, а гаворка ідзе не толькі пра затрыманні, сталі 390 журналістаў, з якіх 77 прайшлі праз адміністрацыйны арышт.
Беларускія праваабаронцы прызналі затрыманых паводле крымінальных спраў Кацярыну Барысевіч, Кацярыну Андрэеву і Дар'ю Чульцову палітвязнямі. Amnesty International назвала Барысевіч вязнем сумлення.
