Пайшла з жыцця прафсаюзная лідарка Марыя Аліева
6- 25.11.2020, 16:44
- 44,624
Яна стала адным з сімвалаў пратэстнай Серабранкі.
Марыя Аліева нарадзілася ў 1953 годзе і ўвайшла ў найноўшую гісторыю Беларусі як прафсаюзная дзяячка і лідарка жаночага руху, паведамляе «Радыё Свабода».
Яна працавала на Менскім маторным заводзе, Менскім электратэхнічным заводзе. Затым стала намесніцай Беларускага кангрэсу дэмакратычных прафзвязаў, а з 1995 да 1999 узначальвала Свабодны прафзвяз Беларускі.
Была сябрам партыі БСДП (Грамада).
Пра смерць Марыі паведаміў у «Фэйсбуку» кіраўнік партыі БСДП (Грамада) Ігар Барысаў.
З ягоных звестак, Марыі стала дрэнна падчас размовы праз тэлефон. Яе спрабавалі рэанімаваць, але не атрымалася.
«Для новай хвалі яна стала адным з сімвалаў пратэстнай Серабранкі. Яе шмат хто ведаў і прыслухоўваліся да яе слоў, яна ўмела матываваць людзей...яе кватэра стала фактычным штабам мікрараёна. Да яе асабіста прыходзілі міліцыянты, каб дамаўляцца, бо ведалі, каго будзе слухаць народ і за кім ён пойдзе.
Марыя Рыгораўна не прапускала і маршы пенсіянераў...Толькі яе вясёлае прывітанне АМАПа «Хлопчыкі, Жыве Беларусь!» яны, сціснуўшы зубы, адказвалі: «Жыве!». Яе моцна ўсхваляваў і раз'ятрыў факт атрымання пратаколу, які быў складзены на яе дачку за ўдзел у мітынгу 25 кастрычніка. Дачку абвінавачвалі на падставе вядомага арт.23.34 за ўдзел у несанкцыянаваным мітынгу...З гэтым перажываннем яна не справілася...»
У 1999 годзе Марыя Аліева ўзначаліла Беларускую арганізацыю працоўных жанчын. Адной з першых запамінальных жаночых акцый з яе ўдзелам стаў «Марш пустых рондаляў» у 1999 годзе.
Вось як пра яе ўзгадвае кіраўніца арганізацыі «Гендэрныя перспектывы» Ірына Альхоўка.
«Маша - першае пакаленне жанчын-лідараў у Беларусі. Памятаю яе вельмі шчырай, добрай да людзей. Маша любіла людзей, даравала ім шмат, патрабавала шмат ад сябе і ад іншых. Была прамалінейнай, казала, што думала. Самародак, мы разам усяму вучыліся, - кажа Ірына. - Яна думала пра свабодную Беларусь, незалежную краіну, пра тое, каб людзей не каралі за іх погляды. Мяне зусім не здзівіла, што яна ўдзельнічае ў Маршы пенсіянераў, яна нешта тлумачыла. Гэта была яна, сапраўдная Маша».
Рэдакцыя сайта Charter97.org прыносіць шчырыя спачуванні родным і блізкім Марыі Аліевай.
Развітанне з Марыяй Аліевай адбудзецца ў чацвер 26 лістапада з 10:00 да 11:00 у Доме смутку (Менск, вул. Куляшова, 12).