Гурт Tor Band выпусціў магутную песню пра Рамана Бандарэнку

Героям – вечная слава!

Папулярны беларускі гурт Tor Band выпусціў песню ў памяць пра Рамана Бандарэнку.

Збіты невядомымі ў менскім двары, які за апошнія 100 дзён стаў вядомым як Плошча Пераменаў, і адвезены ў Цэнтральны РУУС Менска, Раман памёр амаль праз дзень ад цяжкіх траўмаў галавы ў лякарні, не прыходзячы ў прытомнасць.

Пахавала сына маці, больш яго ня ўбачыць.

Ён жа сам быў вінаваты, каты ёй тлумачаць.

Стала пуста ў яе хаце, сэрца стогне болем.

Толькі ведай, ведай маці, стаў сын твой героем.

Маці сядзіць адна на ганку, а перад вачыма

Хлопец бегае маленькі, нагадаў ёй сына.

Забалела сэрца ў маці, і ў адну хвіліну

Дыхаць поўнымі грудзьдзьмі ёй стала немагчыма.

Вечная ім слава! Героям слава!

Будуць жыць у сэрцы, як Колас і Купала.

Дзякуй, добрая матуля, за такога брата.

За герояў нашых будзе катам усім расплата.

Нас усіх не перабіць, мы адкажам боем.

Ты запамятаваў, кат, гэта край герояў.

Гурт Tor Band з Рагачова стаў папулярны гэтым летам праз песню «Сцяг свабоды – над галавой», якая стала адным з гімнаў беларускай рэвалюцыі.